အရာတော်မြောက်နယ် ဘောင်းကျရွာအဝင်တွင် အကြမ်းဖက် စစ်ကောင်စီစစ်ကြောင်း မိုင်းဆွဲတိုက်ခိုက်ခံရပြီး စစ်သား ၁၅ ယောက်ထက်မနည်း သေဆုံးနိုင်ကြောင်း အရာတော်သတင်းမှန်ပြန်ကြားရေးက သတင်းထုတ်ပြန်သည်။
ယနေ့ နိုဝင်ဘာ(၁၀)ရက် ညနေပိုင်းတွင် အရာတော်မြောက်နယ်၊ ဘောင်းကျကျေးရွာအနီးသို့ ရောက်ရှိလာသော အင်အား(၁၀၀)ခန့်ပါသောအကြမ်းဖက်စစ်ကောင်စီ၏
စစ်ကြောင်းကို အရာတော်မြို့နယ် တော်လှန်ရေးအင်အားစု (ARA) မြောက်ပိုင်းမှ ဂဠုန်ညီနောင်တပ်ဖွဲ့ က မိုင်းဆွဲတိုက်ခိုက်ခဲ့ကြောင်း၊ စစ်ကားများကိုရပ်ထားပြီး ခြေလျင်စစ်ကြောင်းဖြင့်တက်လာချိန် မိုင်းဆွဲတိုက်ခိုက်ခံရခြင်းဖြစ်ကြောင်း၊ အကြမ်းဖက်စစ်သား(၄၀)ခန့် ဒဏ်ရာရရှိသွားပြီး ဒဏ်ရာပြင်းထန်သေဆုံးသူ(၁၅)ဦးထက်မနည်းရှိမည်ဟု ARA ပြန်ကြားရေးက ဖုန်းဖြင့် ထုတ်ပြန်အတည်ပြုပေးထားသည်ဟု အရာတော်သတင်းမှန် ပြန်ကြားရေးက အသိပေးသည်။
အကြမ်းဖက်စစ်တပ်မှာ မိုင်းထိပြီးနောက် ဖရိုဖရဲဖြစ်ကာ ပြန်လည်ရမ်းသန်းပစ်ခတ်နေသည်ကို အနီးအနားရွာများကပင် အချိန်အတော်ကြာ ကြားခဲ့ရသည်ဟုဆိုသည်။ သေဆုံးသူအပြတ်အတောက်များနှင့် ဒဏ်ရာရသူများကို ကျန်ရှိအကြမ်းဖက်မအလစစ်သားများက ရွာထိပ်ဆေးခန်းထဲသို့ ဆွဲခေါ်နေစဥ်၌ပင်သေနတ်ဖြင့်တောက်လျှောက်ပစ်ခတ်သွားခဲ့ကြောင်း ဒေသခံတို့ကပြောသည်။
ယခုအခါ အဆိုပါဒဏ်ရာရသူများကိုလည်း ပြန်မပို့နိုင်သေးဘဲ ကျန်ရှိစစ်တပ်က မကြာခဏသေနတ်ဖောက်၍ စောင့်ဆိုင်းနေသည်ဟု ARA မြောက်ပိုင်းကထုတ်ပြန်သည်။
ညပိုင်းတွင် အကြမ်းဖက်စစ်တပ်က အင်အားထပ်ဖြည့်လာပြီး အရာတော်မြောက်နယ်ကို ဝင်ရောက်မွှေနှောက်မည်ဟု ယူဆရသဖြင့် ဘောင်းကျရွာနှင့် အနီးအနားရွာများမှ ပြည်သူများရှောင်တိမ်းနေသည်ဟု ဒေသခံတစ်ဦးကပြောသည်။