မြန်မာစစ်အာဏာရှင်ဟာ မတရားဖမ်းဆီးထားတဲ့ နိုင်ငံရေးအကျဉ်းသားတွေကို ချက်ချင်းလွှတ်ပေးရမှာဖြစ်ပြီး ပြင်းထန်တဲ့ထောင်ဒဏ်ချမှတ်မှုတွေ၊ လုပ်ကြံစွပ်စွဲမှုတွေဟာ တရားမျှတမှုကို အလေးမထားတာဖြစ်တယ်လို့ ဗြိတိန်ရဲ့အာရှရေးရာဝန်ကြီး Amanda Milling က ပြောပါတယ်။
“မြန်မာ့ စစ်အာဏာရှင်က ဒီမိုကရေစီစနစ်၊ လွတ်လပ် ခွင့်နဲ့ တရားဥပဒေစိုးမိုးရေးတို့ကို ဆက်လက်ဖျက်ဆီးနှောက်ယှက်နေဆဲဖြစ်ပါတယ်။ နိုင်ငံရေးအတိုက်အခံပါတီဝင်များအပေါ် ပြင်းထန်တဲ့ ထောင်ဒဏ်ချမှတ်မှုတွေနဲ့ လုပ်ကြံစွပ်စွဲမှုတွေဟာ စစ်အာဏာရှင်အနေနဲ့ တရားမျှတမှုကို အလေးထားခြင်းမရှိကြောင်း ပြသနေတာပဲဖြစ်ပါတယ်”လို့ Amanda Milling က ပြောပါတယ်။
တရားမဝင်အာဏာသိမ်းစစ်တပ်ဟာ ပြီးခဲ့တဲ့ရက်ပိုင်းက NLD ပါတီသဘာပတီ ဦးဝင်းထိန်ကို ထောင်ဒဏ်အနှစ် ၂၀ ချမှတ်ခဲ့ပြီး ကရင်ပြည်နယ်ဝန်ကြီးချုပ်ဟောင်း၊ NLD ဗဟိုအလုပ်အမှုဆောင်အဖွဲ့ဝင် နန်းခင်ထွေးမြင့်ကိုလည်း ထောင်ဒဏ် ၇၅ နှစ်ချမှတ်ခဲ့ပါတယ်။ အလားတူ ကရင်ပြည်နယ်ဝန်ကြီး ဦးသန်းနိုင်ကို ထောင်ဒဏ် ၉၀ နှစ်ချမှတ်ခဲ့ပါတယ်။
ဒါ့အပြင် NLD ပါတီခေါင်းဆောင် နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို ပုဒ်မပေါင်း ၁၁ ခုနဲ့ စွဲချက်တင်ထားပြီး ပုဒ်မပါပြစ်ဒဏ်တွေအတိုင်း အပြည့်ချမှတ်ရင် ထောင်ဒဏ် နှစ် ၁၀၀ ကျော် ချမှတ်ဖို့ ရှိနေတာဖြစ်ပါတယ်။
