အပြစ်မဲ့ပြည်သူများအား ဖမ်းဆီးနှိပ်စက်သတ်ဖြတ်ခြင်းကို ရပ်တန်းကရပ်ပြီး လက်နက်ကိုင်အချင်းချင်း သတ္တိရှိရှိရင်ဆိုင်ရန် ရန်ကုန်တိုင်း စစ်ဒေသကွပ်ကဲရေးအဖွဲ့က စစ်ကောင်စီထံ သတိပေးစာကို ယနေ့(နိုဝင်ဘာ ၁၁) ထုတ်ပြန်လိုက်သည်။
ရန်ကုန်တောင်ပိုင်းခရိုင် ကွမ်းခြံကုန်းမြို့နယ်အတွင် စစ်ကောင်စီတပ်ယာဉ်တန်းကို တိုက်ခိုက်ပြီးနောက်ပိုင်း ယင်းမြို့နယ်အတွင်းရှိ ဒေးဒနောရွာနှင့် အင်္ဂလုံးကျေးရွာများမှ ပြည်သူအယောက် ၄၀ ကျော်ကို ဖမ်းဆီးနှိပ်စက်လျက်ရှိပြီး ၁၀ဦးမှာ အသက်အန္တရာယ်စိုးရိမ်ရသည့်အခြေအနေကို စုံးစမ်းသိရှိရကြောင်း ထုတ်ပြန်ချက်တွင် ဖော်ပြသည်။
ထို့အပြင် ဒေးဒနောရွာမှ အသက် ၃၅ နှစ်ခန့်ရှိ ကိုဇော်မင်းဦး အသက် ၁၉ နှစ်အရွယ်ရှိ မောင်ဝေဇင်အောင်နှင့် အသက် ၄၀ ခန့်ရှိ ကိုဝင်းအောင်လတ် စသူတို့မှာ အကြမ်းဖက်စစ်ကောင်စီတပ်သားများ၏လက်ချက်ဖြင့် အသက်သေဆုံးခဲ့ရသည့်အပြင် မိသားစုများထံ ရုပ်အလောင်းပင်ပြန်မပေးခဲ့ဟု ထုတ်ပြန်ချက်က ဆိုသည်။
ယယခုကဲ့သို့ အပြစ်မဲ့ အရပ်သားများကို ဦးတည်တိုက်ခိုက်နေခြင်းမှာ စစ်ရာဇဝတ်မှု ကျူးလွန်နေခြင်းဖြစ်ပြီး ပြည်တွင်းနှင့် နိုင်ငံတကာဥပဒေများအရ မလွဲမသွေ အရေးယူခံရမည်ကို အကြမ်းဖက်စစ်ကောင်စီတပ်သားများ သိနားလည်စေလိုသည် ရန်ကုန် တိုင်းစစ်ဒေသကွပ်ကဲရေးအဖွဲ့က ထောက်ပြသည်။
Public Service Announcement
ထို့ကြောင့် အပြစ်မဲ့ ပြည်သူများအား ဖမ်းဆီးနှိပ်စက်ခြင်းမပြုဘဲ၊ စစ်ဘက်ဆိုင်ရာ ကျင့်ဝတ်များနှင့်အညီ လက်နက်ကိုင်ပြည်သူ့တော်လှန်ရေးတပ်သားများကိုသာ သတ္တိရှိရှိရင်ဆိုင်တိုက်ခိုက်ရန် သတိပေးတိုက်တွန်းထားသည်။
ရန်ကုန်တိုင်းစစ်ဒေသခွဲကွပ်ကဲရေးအဖွဲ့အနေဖြင့် နိုဝင်ဘာ ၅ ရက် ညပိုင်းက “ပျံလွှားအောင်” စစ်ဆင်ရေး စီမံချက်ဖြင့် အကြမ်းဖက်စစ်ကောင်စီတပ်မှ လှည့်ကင်းစစ်ကားတစ်စီကို မိုင်းခွဲတိုက်ခိုက်ခဲ့ရာ စစ်သားခုနစ်ဦးသေးဆုံးကာ ၁၃ ဦး ထိခိုက်ဒဏ်ရာရရှိခဲ့သည်။
