အမျိုးသမီးအရာရှိတစ်ဦး အကြမ်းဖက်စစ်တပ်ကို ဆန့်ကျင်ဖီဆန်ပြီး ပြည်သူဘက်မျက်နှာမူလာ

အကြမ်းဖက်စစ်တပ်ကို ဆန့်ကျင်ဖီဆန်တဲ့တပ်မတော်သားတွေထဲမှာ အမျိုးသမီးအရာရှိတစ်ဦးပါဝင်လာပြီး နောင်လာမယ့်​နေ့ရက်​တွေမှာသိက္ခာရှိစွာ​နေထိုင်သွားချင်လို့ ပြည်သူဘက်မျက်နှာမူခဲ့တာဖြစ်တယ်လို့ CDM ပြုလုပ်လာသူ ဗိုလ်ကြီးမေပိုးက ပြောပါတယ်။

စစ်တပ်အာဏာသိမ်းချိန်ကစလို့ တရားမျှတမှုမရှိတဲ့ လုပ်ရပ်တွေ၊ ပြည်သူတွေကိုအကြောင်းမဲ့ သတ်ဖြတ်တာတွေကို ဘယ်လိုမှလက်ခံလို့မရတဲ့အတွက် တော်လှန်ရေးမှာ ပူးပေါင်းပါဝင်ဖို့ ပြည်သူလူထုဘက် မျက်နှာမူလာတာဖြစ်တယ်လို့ ဗိုလ်ကြီးမေပိုးက ပြောကြောင်း People’s Soldiers ပြည်သူ့စစ်သားများအဖွဲ့ကထုတ်ပြန်ပါတယ်။

“တပ်မ​တော်ကပြည်သူ​​တွေကိုတင်မကဘူး တပ်မ​တော်သားအချင်းချင်းလည်း ဖိနှပ်မှုမျိုးစုံရှိတဲ့အတွက်​ကြောင့်တပ်တွင်းမှာလည်း စစ်​ကောင်စီကိုစွန့်ခွာချင်သူ​တွေများပြားလာပါပြီ” လို့ ဗိုလ်ကြီးမေပိုးက ပြောပါတယ်။

နောင်လာမယ့်အနာဂတ်မှာ စစ်သားဆိုတာနဲ့ ပြည်သူတွေက မုန်းတီးနေတာမျိုးမဖြစ်ရအောင်၊ ဒီလိုပြဿနာတွေကိုဖန်တီးတဲ့ အာဏာရှင်တွေကို အမြစ်ပြတ်အောင် တပ်မတော်သားအားလုံး ပူးပေါင်းပါဝင်ဖို့လိုအပ်တယ်လို့လည်း ဗိုလ်ကြီးမေပိုးက တိုက်တွန်းပါတယ်။

Public Service Announcement

ပြည်သူ့စစ်သားများအဖွဲ့ဟာ ပြည်သူ့ဘက်ရပ်တည်ခဲ့တဲ့ တပ်မတော်သားကောင်းတွေနဲ့ ဖွဲ့စည်းထားခြင်းဖြစ်ပါတယ်။

ပြည်သူ့စစ်သားများအဖွဲ့ဟာ Defection Strategy ကို NUG အစိုးရအား တင်ပြနိုင်ခဲ့ပြီးနောက် NUG က “ တပ်မတော်သားနှင့်စပ်လျဉ်းသော မူဝါဒ” ထုတ်ပြန်ပေးခဲ့တယ်လို့ People’s Soldiers အဖွဲ့ ထုတ်ပြန်ထားပါတယ်။

အဲဒီနောက်မှာ NUG အစိုးရရဲ့ အမြော်အမြင်ရှိရှိ ဆောင်ရွက်ချက်တွေ ၊ ပြည်သူတွေရဲ့ နွေးထွေးစွာ ကြိုဆိုမှုတွေကြောင့် Defection Strategy ကို ပိုမိုလက်ခံလာကြပြီး NUG အစိုးရကွပ်ကဲမှုနဲ့ ပြည်သူ့ရင်ခွင် အစီအစဉ်ပေါ်ပေါက်လာခဲ့တယ်လို့ ဆိုပါတယ်။