မင်းတပ်-မတူပီလမ်းတွင် စစ်ကောင်စီတပ်ကနင်းမိုင်းများ ထောင်ထား၍ ဂရုပြုသွားလာရန်သတိပေး

ချင်းပြည်နယ် မင်းတပ် – မတူပီလမ်း တလျှောက်တွင် အာဏာသိမ်းစစ်ကောင်စီတပ်ထောင်ထားခဲ့သော နင်းမိုင်းများကြောင့် ပြည်သူများထိခိုက်မှုရှိနေ၍ သတိပြု သွားလာနေထိုင် ကြရန် မင်းတပ်မြို့နယ်ပြည်သူ့အုပ်ချုပ်ရေးသတင်းအဖွဲ့က ယမန်နေ့ညပိုင်းတွင် ထုတ်ပြန်သည်။

နိုဝင်ဘာ ၂၁ရက်ကမင်းတပ်-မတူပီလမ်း ၁၄ မိုင်လမ်းခွဲတွင် စစ်ကောင်စီထောင်ထားသည့် မိုင်းကို ဆိုင်ကယ်ဖြင့်တက်နင်းမိ၍ ပေါက်ကွဲပြီး ဆိုင်ကယ်စီးပြည်သူ ၂ဦး အနည်းငယ်ထိခိုက်ခဲ့သည်ဟု ဆိုသည်။

မင်းတပ်မြို့နယ်အတွင်း မပေါက်ကွဲဘဲကျန်နေသော လက်နက်ကြီး အမြောက်ဆံအမျိုးမျိုး၊ မော်တာကျည်အမျိုးမျိုး ကျေးရွာတောတောင်များတွင် ကျန်ရှိနေသေးကြောင်း အသိပေးခဲ့ပြီး မိုင်းအန္တရာယ်မှ ကာကွယ်ရန် လိုက်နာရှောင်ကြဉ်ရမည့်အချက်များကို ထုတ်ပြန်ခဲ့သည်။

မြေပြင်ပေါ်တွင် တွေ့ရှိနေသည့် ပေါက်ကွဲစေတတ်သော စစ်လက်နက်ပစ္စည်းအကြွင်းအကျန်များသည် အချိန်မရွေးပေါက်ကွဲနိုင်ကြောင်း၊ ထိုအရာဝတ္ထုပစ္စည်းများအား ကိုင်တွယ်ခြင်း သို့မဟုတ် စုဆောင်းခြင်း မပြုလုပ်ရန်၊ ထိုအရာဝတ္ထုပစ္စည်းများအား နေရာရွှေ့ခြင်း သို့မဟုတ် တစ်စုံတစ်ရာဖြင့်ပစ်ပေါက်ခြင်း မပြုလုပ်ရန်နှင့် ထိုအရာဝတ္ထုပစ္စည်းများအနီးသို့ သွားရောက်ခြင်း မပြုရန်သတိ့​ပေးထားသည်။

Public Service Announcement

ဖြစ်နိုင်ပါကသင့်တော်သည့်အကွာအဝေးတွင်သတိပေးအမှတ်အသားပြုလုပ်ခဲ့ပြီး သက်ဆိုင်ရာပြည်သူ့အုပ်ချုပ်‌ရေး တာဝန်ရှိသူများထံသို့ ချက်ခြင်းသွားရောက်အကြောင်းကြားရန်လည်း မင်းတပ်ပြည်သူ့အုပ်ချုပ်ရေးသတင်းအဖွဲ့ကအကြံပြုတိုက်တွန်းထားသည်။