ဒီးမော့ဆိုမြို့နယ် ဟိုဖိတ်ကျေးရွာအနီးတွင် အကြမ်း ဖက်စစ်ကောင်စီတပ်နှင့် ကရင်နီတပ်မတော်(KNDF)တို့ တိုက်ပွဲပြင်းထန်နေကြောင်း ပြည်သူ့ကာကွယ်ရေးတပ်မတော်-ဒီးမော့ဆိုမှ တာဝန်ရှိသူတစ်ဦးက ပြောသည်။
ယနေ့(နိုဝင်ဘာလ ၂၅ ရက်) နံနက် ၆နာရီခန့်ကစ၍ ပြည်သူ့ကာကွယ်ရေးကရင်နီပူးပေါင်းတပ်ဖွဲ့များက စစ်ကြောင်းထိုးလာသည့် အကြမ်းဖက်စစ်ကောင်စီတပ်ကို ခုခံတိုက်ခိုက်နေခြင်းဟု ၎င်းကဆိုသည်။
“အရင်နေ့တွေက ဖြစ်ခဲ့တဲ့ စံပြ(၆)မိုင်အနီးက ဟိုဖိတ် ကျေးရွားနားမှာ အစောကြီးတိုက်ပွဲ ဖြစ်နေတယ်။မြေပြင် အခြေအနေကိုတော့ မသိရသေးဘူး”ဟု အထက်ပါတာဝန်ရှိသူက ပြောသည်။
နိုဝင်ဘာ ၂၃ ရက်ကလည်း ဒီးမော့ဆိုမြို့နယ် စံပြ(၆)မိုင် ဒေါပိုးစီကျေးရွာတွင် တပ်စွဲထားသည့် အကြမ်းဖက်စစ်ကောင်စီတပ်ကို ဝင်ရောက်တိုက်ခိုက်ခြင်း အပါအဝင် ထိတွေ့တိုက်ပွဲ လေးကြိမ်ဖြစ်ပွားကာစစ်တပ်မှ ငါးဦးသေပြီး ခုနှစ်ဦးဒဏ်ရာရခဲ့သည်။
နိုဝင်ဘာ ဒုတိယပတ်ကစ၍ ဒီးမော့ဆိုနယ်မြေတွင် အကြမ်းဖက်စစ်ကောင်စီနှင့် ကရင်နီတပ်မတော်တို့ ထိတွေ့တိုက်ပွဲများပြင်းထန်ခဲ့ပြီး စစ်ကောင်စီတပ်သား၂၀ ဦးထက်မနည်းသေဆုံးကာ ကရင်နီတပ်မတော်သားတစ်ဦးကျဆုံးခဲ့သည်။