ထားဝယ်တပ်ပေါင်းစုသပိတ်ကော်မတီဝင်ကိုထူးမြတ်လွင်အပါအဝင် ကိုစိုင်းကိုကိုထွန်း၊ မလဝန်းပြည့်ပြည့်ထွန်းတို့ကို ယနေ့နံနက်တွင် အကြမ်းဖက်စစ်ကောင်စီအဖွဲ့က အတင်းအဓမ္မခေါ်ဆောင်ဖမ်းဆီးသွားကြောင်း ဒီမိုကရေစီအရေး လှုပ်ရှားမှုသပိတ်ကော်မတီ(ထားဝယ်ခရိုင်)က သတင်းထုတ်ပြန်သည်။
ယနေ့(နိုဝင်ဘာ၃၀ရက်)နံနက်၆ နာရီခွဲတွင် နေအိမ်များသို့ လာရောက်ဖမ်းဆီးခဲ့ခြင်းဖြစ်သည်ဟု ထားဝယ်မြို့ခံများက ပြောသည်။
ကိုထူးမြတ်လွင်သည် ထားဝယ်တက္ကသိုလ် အရှေ့တိုင်းပညာဌာန တတိယနှစ်ကျောင်းသား တစ်ဦးလည်းဖြစ်သည်။ ထားဝယ်မြို့တွင် အကြမ်းဖက်စစ်ကောင်စီအဖွဲ့က လူငယ်များကို ဆက်တိုက်ဖမ်းဆီးနေခြင်းဖြစ်ပြီး ယခုသီတင်းပတ်အတွင်း ၁၀ ဦးထက်မနည်းဖမ်းဆီးခံထားရသည်ဟု မြို့ခံများက ပြောသည်။
ဖမ်းဆီးခံရသူသုံးဦးကို မည်သည့်နေရာသို့ ဖမ်းဆီးခေါ်ဆောင်သွားသည်ကိုလည်း မသိရကြောင်း မြို့ခံများကဆိုသည်။
Public Service Announcement
ထိုအပြင် နိုဝင်ဘာ ၂၅ ရက်ကလည်း ထားဝယ်နည်းပညာတက္ကသိုလ် လျှပ်စစ်စွမ်းအားအင်ဂျင်နီယာဌာနက ပဉ္စမနှစ်ကျောင်းသူ မသိမ့်ဇင်ဇင်ဖူးကိုလည်း အကြမ်း ဖက်စစ်ကောင်စီ မတရားဖမ်းဆီးထိန်းသိမ်းထားသည်ဟု ထားဝယ်နည်းပညာတက္ကသိုလ်ကျောင်းသားသမဂ္ဂကလည်း သတင်းထုတ်ပြန်ထားသည်။
နေအိမ်နှင့်အဆက်အသွယ်ပြတ်တောက်နေသည့်
မသိမ့်ဇင်ဇင်ဖူးအား ဖမ်းဆီးထားခြင်းကို နိုဝင်ဘာ ၂၉ ရက်မှသာ သိရှိခဲ့ရခြင်းဖြစ်သည်ဟု ထုတ်ပြန်ခဲ့သည်။
