အကြမ်းဖက်မြန်မာစစ်ကောင်စီရဲ့ကိုယ်စားလှယ်ကို ကုလသမဂ္ဂမှာ ကိုယ်စားပြုခွင့်မပေးသော စိစစ်ရေးကော်မတီရဲ့ဆုံးဖြတ်ချက်ကို ကြိုဆိုကြောင်းနဲ့ သံအမတ်ကြီးဦးကျော်မိုးထွန်းကို အမြဲ တမ်းကိုယ်စားလှယ်အဖြစ် ဆက်လက်ထားရှိနိုင်ရေးတောင်းဆိုကြောင်း ပြည်ထောင် စုလွှတ်တော်ကိုယ်စားပြုကော်မတီ(CRPH)က ထုတ်ပြန်ပါတယ်။
ကုလသမဂ္ဂအရည်အချင်းစစ်ကော်မတီရဲ့ဆုံးဖြတ်ချက်ကို (၇၆) ကြိမ်မြောက် ကုလသမဂ္ဂအထွေထွေညီလာခံမှာ အတည်နိုင်ရေး ဆက်လက်ကူညီပေးဖို့ အဖွဲ့ဝင်နိုင်ငံတွေကို တိုက်တွန်းတောင်းဆိုတယ်လို့လည်း CRPH ရဲ့ ဒီနေ့ထုတ်ပြန်ချက်မှာ ဖော်ပြပါတယ်။
မြန်မာနိုင်ငံမှာ စစ်ကောင်စီတပ်တွေရဲ့ အကြမ်းဖက်လုပ်ရပ်များရပ်တန့်ရေး အပါအဝင် စစ် အာဏာရှင်များအပြီးတိုင် ကျဆုံးရေးနဲ့ ဒီမိုကရေစီ ပြန်လည်ရရှိရေးတို့အတွက် ကမ္ဘာနိုင်ငံများ၊ နိုင်ငံတကာအဖွဲ့အစည်းတွေရဲ့ စစ်ကောင်စီအပေါ် ထိရောက်တဲ့ နိုင်ငံရေး၊ စီးပွားရေး၊ သံတမန် ရေးပိတ်ဆို့မှုတွေဟာ အရေးပါတဲ့ ကူညီဆောင်ရွက်မှုတွေဖြစ်တယ်လို့ CRPH က ဆိုပါတယ်။
ကုလသမဂ္ဂအရည်အချင်းစစ်ကော်မတီဟာ ကုလသမဂ္ဂမှာ မြန်မာနိုင်ငံကိုယ်စားပြုခွင့်နဲ့ ပတ်သက်လို့ ရွှေ့ဆိုင်းဖို့ ဒီဇင်ဘာ ၁ ရက်မှာ ဆုံးဖြတ်ချက်ချမှတ်ခဲ့ပါတယ်။
အဲဒီဆုံးဖြတ်ချက်ချမှတ်မှုအပေါ် အရည်အချင်းစစ်ကော်မတီဥက္ကဋ္ဌ ဆွီဒင်နိုင်ငံဆိုင်ရာကုလသမဂ္ဂ သံအမတ်ကြီး Mrs. Anna Karin Enestrom နဲ့ ကော်မတီ အဖွဲ့ဝင်တွေကို မြန်မာပြည်သူများ ကိုယ်စား များစွာကျေးဇူးတင်ကြောင်းလည်း CRPH က ထုတ်ပြန်ပါတယ်။
