မန္တ​လေးမှ မုံရွာသို့လာသည့် အကြမ်းဖက်စစ်တပ် လက်နက်နှင့် ရိက္ခာများပါယာဥ်တန်း မိုင်းဆွဲတိုက်ခိုက်ခံရ

မန္တလေးဘက် မှ မုံရွာမြို့သို့လာသည့် အကြမ်းဖက်စစ်ကောင်စီ၏ စစ်လက်နက်ပစ္စည်းများနှင့် ရိက္ခာများ တင်ဆောင်လာသော ကား ၁၁စီးပါ ယာဥ်တန်းအုပ်စု မိုင်းဆွဲတိုက်ခိုက်ခံရကြောင်း မုံရွာမြို့နယ် သတင်းမှန်ပြန်ကြားရေးက ယနေ့(ဒီဇင်ဘာ ၂ ရက်) ထုတ်ပြန် သည်။

ဒီဇင်ဘာ ၂ ရက် နံနက် ၁၁ နာရီခန့်က မန္တလေး -မုံရွာ လမ်းမကြီးပေါ်ရှိ မြေနဲကျေးရွာ နှင့်မင်းရွာကျေးရွာ အကြား စွမ်းရည်ထက်ဆီဆိုင်၏ တောင်ဘက်နားတွင် မိုင်းဆွဲ တိုက်ခိုက်ခံရခြင်းဖြစ်သည်။

မိုင်းခွဲတိုက်ခိုက်ခံရသော စစ်ကောင်စီ၏ပစ္စည်းများတင်ဆောင်လာသည့် တွဲကား ၁၁ စီးအနက်တစ်စီးထိမှန်ခဲ့​ပြီး ကားရှေ့ခေါင်းခန်းနှင့် ရှေ့ဘီးများ စုတ်ပြတ်သွားသည်။

အဆိုပါတိုက်ခံမှုကြောင့် စစ်ကောင်စီ၏ ယာဉ်မောင်းနှင့် ယာဉ်နောက်လိုက်သည် ထိခိုက်ဒဏ်ရာရမှု အခြေအနေ ပြင်းထန်ခဲ့​ကြောင်း သိရသည်။

Public Service Announcement

နေ့လည် ၁၂ နာရီခန့်တွင် လူနာတင်ကားဖြင့် ဒဏ်ရာရ ယာဉ်မောင်းသူနှင့် ယာဉ်နောက်လိုက်သာ တင်သွားသည် ဟုသိရပြီး တိုက်ခိုက်ခံရသည့်နေရာ၏ ​မျက်ကွယ်တွင်ရောက်ရှိနေသော ပြည်သူ နှစ်ဦးလည်း မတော်တဆ ထိမှန်မှုများကြောင့် ထိခိုက်ဒဏ်ရာ ရရှိမှုများရှိခဲ့သည်ဟု မုံရွာမြို့နယ် သတင်းမှန်ပြန်ကြားရေးက ဆိုသည်။

မိုင်းဆွဲမှု မှလွတ်ကင်းသွားသည့် ကားများအနက်​ခြောက်စီးသည် ညနေ ၄ နာရီဝန်းကျင်တွင်အနောက် မြောက်တိုင်းစစ်ဌာနချုပ် သို့ ဝင်ရောက်ခဲ့ပြီး ကျန်လေးစီးသည် အလုံ မင်းဒေါင့်ဆိပ်ကမ်းသို့ ရောက်ရှိသွားကြောင်း ထုတ်ပြန်ချက်၌ ပါရှိသည်။

မိုင်းထိခဲ့သည့် ကားပေါ်ပါပစ္စည်းများကို အခြား ကားတစ်စီးဖြင့် ပြောင်းယူကာ အကြမ်းဖက်စစ်ကောင်စီတပ်က လုံခြုံရေးအင်အားအများအပြားဖြင့် ယနေ့ည ၇ နာရီကျော်တွင် အနောက်မြောက်တိုင်းစစ်ဌာနချုပ်သို့ သယ်ယူခဲ့ကြောင်း သိရသည်။