သဖန်းဆိပ်ဆည်အတွင်း ရွှေကျင်သူများ၏ ဖောင်များ၊ စက်များကို စစ်ကောင်စီက မီးရှို့ဖျက်ဆီးပြီး ရွှေကျင်နေသူများအနက် အသက် ၅၀ အောက်အမျိုးသားများကိုယမန်နေ့က ဖမ်းဆီးသွားသည်ဟုကျွန်းလှဒေသခံများကပြောသည်။
စေတီကုန်းရွာမှ အမျိုးသားများကို ယမန်နေ့(ဒီဇင်ဘာ ၃)က ဖမ်းဆီးသွားပြီး ယနေ့ အထိ ပြန်လွတ်မြောက်မလာသေးဟု ၎င်းတို့ကပြောသည်။သို့သော်ဖမ်းဆီးခံရသူအရေအတွက်ကိုမူမသိရသေးပေ။
“အသက် ၅၀ အောက်တွေအကုန်ဖမ်းသွားတာ။ ဖောင်တွေရော စက်တွေရော မီးရှို့ခံရတယ်။ ဖမ်းသွားတဲ့သူတွေ ပြန်လွတ်မလာသေးဘူး”ဟု ဒေသခံတစ်ဦးကပြောသည်။
သဖန်းဆိပ်ဆည်တွင် ဒေသခံများက ယခင်ကတည်းက နားလည်မှုဖြင့် ဖောင်များဖြင့် ရွှေတူးနေကြခြင်းဖြစ်သည်။
Public Service Announcement
အကြမ်းဖက်စစ်ကောင်စီသည် ကျွန်းလှနှင့် တန့်ဆည်နယ်ကို အကြမ်းဖက်တိုက်ခိုက်နေပြီး အရပ်သားတစ်သောင်းကျော်မှာ ထွက်ပြေးတိမ်းရှောင်နေရသည်ဟု ဒေသခံများကပြောသည်။
ထိုအပြင်ယနေ့တွင်ကျွန်းလှမြို့နယ် ပင့်သာကျေးရွာပေါ်မှ ဖြတ်သွားသည့် စစ်ကောင်စီရဟတ်ယာဥ်တစ်စင်းက PDF များအား ပုံဖျက်ထားသည့် ဝါဒဖြန့် စာရွက်များ ကျဲချသွားခဲ့သည်။
“သတင်းတွေက အခုဖြစ် အခုသိနေတာ။ ဘယ်သူက စစ်ခွေး၊ ဘယ်သူက ပြည်သူဘက်တော်သားဆိုတာလွယ်လွယ်လေးသိနေရတဲ့ခေတ်မှာ ဝါဒဖြန့်စာ ချသွားတဲ့ ဦးနှောက်ကတော့ ပိန်းလွန်းတယ်” ဟု ကျွန်းလှမြို့ခံတစ်ဦးကပြောသည်။
