ရန်ကုန်တွင် သံပုံးတီးသည်ဆိုကာ အကြမ်းဖက်စစ်ကောင်စီတပ်များ ​သောင်းကျန်း​​နေ

-အဖမ်းမခံလိုသည့် လူငယ်တစ်ဦး ငါးလွှာတိုက်ပေါ်မှ ခုန်ချဟုဆို

ယနေ့(ဒီဇင်ဘာ ၇)ည ၈ နာရီ ရန်ကုန်မြို့၌ သံပုံးတီး၍ စစ်အာဏာရှင်အား ဆန့်ကျင်ကြောင်းပြသချိန်တွင် တာမွေ၊ ကမာရွတ်နှင့် မဂ်လာ​တောင်ညွန့်မြို့နယ်တို့တွင် အကြမ်းဖက် စစ်ကောင်စီတပ်များက ဖမ်းဆီးခြင်း၊ ကားမှန်များရိုက်ခွဲခြင်းနှင့် ပြည်သူများအား ဆဲဆိုကြိမ်းမောင်ကာ သောင်းကျန်း​နေကြောင်း ဒေသခံများက ပြော သည်။

တာမွေမြို့နယ်အတွင်းရှိ သီတာ၊ သြဘာ၊ အောင်မဂ်လာနှင့် အင်းဝလမ်းများသို့ စစ်ကားများဖြင့် ဝင်ရောက်ကာ ဆဲဆိုခြင်း၊ သေနတ်များဖြင့် တိုက်ခန်းများဆီချိန်ရွယ်၍ ခြိမ်းခြောက်ပြောဆိုခြင်း၊ တိုက်ပေါ်တက် ဖမ်းဆီးခြင်းများ လုပ်ဆောင်ခဲ့သည်ဟု ဒေသခံများက ဆိုသည်။

ထိုသို့ ရပ်ကွက်လမ်းများအတွင်းသို့ စစ်ကောင်စီတပ်များ ဝင်ရောက်လာချိန် အောင်မဂ်လာလမ်းနှင့် အင်းဝလမ်းထောင့် တိုက်တစ်တိုက်ရှိ လူငယ်တစ်ဦးက လက်ကိုင်ဖုန်းဖြင့် မှတ်တမ်းတင်စဥ် စစ်ကောင်စီတပ်များမြင်တွေ့သွား၍ တိုက်ပေါ်တက်ဖမ်းဆီးသည်ကို ထိုလူငယ်က အဖမ်းမခံလို၍ ငါးလွှာရှိတိုက်ပေါ်မှ ခုန်ချသွားကြောင်းလည်း သတင်းများ ထွက်ပေါ်လျက်ရှိသည်။

Public Service Announcement

“ကျွန်တော်တို့ ကျောက်မြောင်းမှာ သံပုံးတွေပြန်တီးတာ ၃ ရက်လောက်ရှိပြီ။ ပြည်သူတွေက သံပုံးတွေပုံမှန်ပြန်တီးလာတော့ စကစတွေက ရပ်ကွက်ထဲလှည့်ပြီး လိုက်ဖမ်းတာတွေ လုပ်လာတယ်။ ဒီညလည်း အောင်မဂ်လာဘက်က ၂ ယောက်ပါသွားတယ်”ဟု ဒေသခံတစ်ဦးက ပြောသည်။

စစ်ကောင်စီတပ်များ တိုက်ပေါ်တက်ဖမ်းဆီးသည်ကို ၎င်းတို့လက်ဝယ်အဖမ်းမခံလိုသောကြောင့် တိုက်ပေါ်မှခုန်ချသည်ဆိုသော လူငယ်တစ်ဦး၏သတင်းနှင့်ပတ်သက်ပြီး လူထုနွေဦးက သီးခြားအတည်ပြုနိုင်ခြင်း မရှိသေးပေ။

ထို့အပြင် ကမာရွတ်မြို့နယ် (၃)ရပ်ကွက် ရတနာလမ်းရှိ ကားများကိုလည်း အကြမ်းဖက်စစ်​ကောင်စီတပ်သားများ ရမ်းကား၍ ရိုက်နှက်ဖျက်ဆီးသွားခဲ့သည်။ ထိုသို့ဖျက်ဆီးမှု​ကြောင့် ရမ်းကားဖျက်ဆီးမှု​ကြောင့် ကားအစီး​ရေ ၂၀ထက်မနည်း ပျက်စီးခဲ့သည်ဟု ဆိုသည်။

မဂ်လာ​တောင်ညွန့်မြို့နယ်တွင်လည်း အကြမ်းဖက်စစ်သားများက ပြည်သူများအား ​အော်ဟစ်ဆဲဆို​နေ​ကြောင်း ​ဒေသခံတစ်ဦးက ​ပြောသည်။