မြန်မာပြည်သူများလိုချင်သည့်ပန်းတိုင် မရောက်မချင်း လက်လျှော့မည်မဟုတ်ကြောင်း အမေရိကန် နိုင်ငံခြား ရေးဝန်ကြီး Antony Blinken က ယနေ့(ဒီဇင်ဘာ၁၄) ပြောကြားသည်။
အင်ဒိုနီးရှားနိုင်ငံသို့ရောက်ရှိနေသော အမေရိကန်နိုင်ငံခြား ရေးဝန်ကြီးသည် ‘A Free and Open Indo-Pacific’ ခေါင်းစဉ်ဖြင့် မိန့်ခွန်းပြောကြားရာ မြန်မာ့အရေးကို ထည့်သွင်းပြောကြားခြင်း ဖြစ်သည်။
“မြန်မာနိုင်ငံမှာ ကျွန်တော်တို့မြင်တွေ့နေရသလိုမျိုး သူတို့ပြည်သူတွေရဲ့အခွင့်အရေးကို မလေးစားတဲ့ ခေါင်းဆောင်တွေကို ကျွန်တော်တို့ အတူတကွ ဆန့်ကျင်ရပ်တည်သွားမှာပါ”ဟု Antony Blinkenက ပြော သည်။
ထို့အပြင် ခွဲခြားမှုမရှိသည့် အကြမ်းဖက်ရပ်တန့်ရေး၊ မတရားဖမ်းဆီးထိန်းသိမ်းခံရသူအားလုံး ပြန်လွှတ်ပေးရေး၊ နှောင့်နှေးကြန့်ကြာမှုမရှိဘဲ အကူအညီများခွင့်ပြုရေးနှင့် အားလုံးပါဝင်သော ဒီမိုကရေစီလမ်းကြောင်းပေါ်ပြန်လည်ရောက်ရှိရေးအတွက် စစ်ကောင်စီကို ဖိအားပေးရန် မိတ်ဖက်နိုင်ငံများ၊ လုပ်ဖော်ကိုင်ဖက်များနှင့် အတူလုပ်ဆောင်သွားမည်ဟု အမေရိကန်နိုင်ငံခြား ရေးဝန်ကြီးက ပြောသည်။
Public Service Announcement
မြန်မာပြည်သူများ၏ ဆန္ဒကို လေးစားသော ငြိမ်းချမ်းစွာအဖြေရှာရေးကို ရှာဖွေရန် ဘက်အားလုံးနှင့် အပြုသဘောတွေ့ဆုံဆွေးနွေးရေးကို တောင်းဆိုသည့် အာဆီယံ၏ ဘုံသဘောတူညီချက် ၅ ရပ်ကို ဆက်လက်လုပ်ဆောင်နေကြောင်းလည်း Antony Blinken က ပြောသည်။
