စစ်ဘေးရှောင်နေရသော ဂန့်ဂေါမြို့နယ် နှမ်းခါးရွာမှ အဘွားအိုနှစ်ဦး အအေးဒဏ်ကြောင့် သေဆုံးသွားကြောင်း နှမ်းခါးရွာဒေသခံများက လူထုနွေဦးသို့ ပြောသည်။
“ဒီနေ့ မနက်ပိုင်းပဲ ရှေ့ဆင့်၊နောက်ဆင့် ဆုံးပါးသွားကြတာ။အသက် အရွယ်အရ (၇၀) ကျော် (၈၀)တွေ ပါ။နေရတဲ့ နေရာမှာ ဆေးဝါးကအစ အဆင်မပြေကြဘူးလေ”ဟု စစ်ဘေးရှောင်နေရသည့် နှမ်းခါးရွာခံတစ်ဦးက ရှင်းပြသည်။
ထို့အပြင် စစ်ဘေးရှောင် ပြည်သူများအတွက် စုဆောင်ထားသော ဆန်အိတ်၅၀၊ဆီပိဿာ၅၀၊ဆေးဝါး၊အဝတ် အထည်နှင့်ခြုံစောင်များကို အကြမ်းဖက်စစ် ကောင်စီက ဒီဇင်ဘာ ၁၉ ရက်တွင် မီးရှိုဖျက်ဆီးခဲ့ကြောင်းလည်း သိရသည်။
“အဝတ်အထည် ခြုံစောင် နဲ့ ဆေးဝါးတွေကို လှူပေးဖို့ မေတ္တာရပ်ခံပါတယ်”ဟု နှမ်းခါးရွာပြန်လည်ထူထောင်ရေး အဖွဲ့ဝင်တစ်ဦးက ပြောသည်။
ဒီဇင်ဘာ ၁၇ ရက် နေ့လည် ၁ နာရီခွဲခန့်က တိုက်ခိုက်ရေးသုံး ရဟတ်ယာဥ်သုံးစီးဖြင့် လက်နက်ကြီး အချက် ၂၀ ကျော် နှင့် စက်လက်နက် အချက်ရာနှင့်ချီ၍ နှမ်းခါးကျေးရွာသို့ ပစ်ခတ်ခဲ့သည်။
ထို့ကြောင့် ဒေသခံပြည်သူ ၄,၀၀၀ ကျော်မှာ စစ်ဘေးတိမ်ရှောင်နေရဆဲ ဖြစ်သည်။အကြမ်းဖက်စစ်တပ်၏ လေယာဥ်သုံးပစ်ခတ်မှုကြောင့် နှမ်းခါးကျေးရွာ၌ ဒေသခံ ပြည်သူ ၁၁ ဦး နှင့် ရဲဘော် ရှစ်ဦး ကျဆုံးခဲ့ရသည်။