ကုလလုံခြုံရေးကောင်စီအနေနဲ့ ကျုးလွန်သူတွေကိုအရေးယူနိုင်ရေးအမြန်လုပ်ဖို့ တိုက်တွန်းထား
ကယားပြည်နယ် ၊ဖရူဆိုမြို့နယ်က လမ်းမပေါ် လူပေါင်း ၃၀ ကျော်သတ်ဖြတ်ခံရတဲ့ဖြစ်စဉ်မှာ ဝန်ထမ်း ၂ ဦးလည်း သတ်ဖြတ်ခံရသူတွေထဲပါဝင်သွားတယ်လို့ Save the Children ကဒီနေ့ညပိုင်းမှာအတည်ပြုလိုက်ပါတယ်။
ဖရူဆိုမြို့နယ်အတွင်း ကလေး နဲ့အမျိုးသမီးတွေအပါအဝင် လူပေါင်း ၃၀ ကျော်သတ်ဖြတ်ခံရတဲ့ဖြစ်စဉ်ဟာ ဒီဇင်ဘာလ ၂၄ ရက်ဖြစ်ခဲ့တာပါ။
အသတ်ခံရသူတွေထဲပါသွားတဲ့ ဝန်ထမ်း ၂ ဦးဟာ ကလေးသူငယ်တွေ ရဲ့ပညာရေး တိုးတက်ဖွံ့ဖြိုးမှုဆိုင်ရာလုပ်ငန်းတွေကို ဆောင်ရွက်ပေးနေသူဖြစ်ပြီး လသားအရွယ် ကလေးငယ်တွေရဲ့ ဖခင်တွေလည်းဖြစ်ကြတယ်လို့ Save the Children က အသိပေးထားပါတယ်။
တစ်ဦးဟာ အသက် ၃၂ နှစ်အရွယ်ရှိပြီး ၁၀ အရွယ် ကလေးငယ်ရဲ့ ဖခင်ဖြစ်သလို နောက်ဝန်ထမ်းတစ်ဦးဟာလည်း အသက် ၂၈ နှစ်ရှိပြီဖြစ်ကာ ၃ လအရွယ် ကလေးငယ်ရဲ့ဖခင်ဖြစ်တယ်လို့သိရပါတယ်။
သူတို့ ၂ ဦးဟာ Save the Children အဖွဲ့အစည်းမှာ လုပ်ကိုင်နေတာဟာ နှစ်ချီပြီလို့လည်း သိရပါသေးတယ်။
ဒါအပြင် သူတို့ ၂ ဦးဟာ အနီးအနားက ရပ်ရွာတွေမှာ လူသားချင်း စာနာထောက်ထားမှုဆိုင်ရာ လုပ်ငန်းတွေ ဆောင်ရွက်အပြီး ရုံးကို ပြန်လာချိန်မှာတိုက်ခိုက်မှု ဖြစ်စဉ်နဲ့ကြုံခဲ့ရတာလို့ Save the Children က ဆိုထားပါတယ်။
ဒီတိုက်ခိုက်မှုဖြစ်စဉ်အတွင်း စစ်တပ်ဟာ ပြည်သူတွေကိုအဓမ္မဖမ်းဆီးတာ ၊သတ်ဖြတ်တာနဲ့ မီးရှို့တာတွေကိုလုပ်ဆောင်ခဲ့တယ်ဆိုတဲ့ သတင်းတွေရဲ့ဖော်ပြချက်ကိုကြားသိရတယ်လို့ လည်းSave the Children က ထုတ်ပြန်ချက်မှာဖော်ပြထားပါသေးတယ်။
ဒီဖြစ်စဉ်နဲ့ပတ်သက်ပြီး စုံစမ်းစစ်ဆေးမှုတွေကို ဆက်လုပ်နေပြီး ကုလသမဂ္ဂလုံခြုံရေးကောင်စီအနေနဲ့လည်း ကျုးလွန်သူတွေကို အရေးယူဖို့ လုပ်ဆောင်ရမယ့် အဆင့်တွေကို အမြန်ဆုံးစီစဉ်ဆောင်ရွက်ရမယ်လို့ Save the Children ကတိုက်တွန်းထားတာတွေ့ရပါတယ်။
Save the Children ဟာ မြန်မာနိုင်ငံမှာ ၁၉၉၅ ခုနှစ်ကစတင်ပြီး ကျန်းမာရေး ၊အာဟာရ ၊ပညာရေးနဲ့ကလေးသူငယ်ကာကွယ်စောင့်ရှောက်ရေးစီမံချက်တွေကို နိုင်ငံအဝှမ်းလုပ်ဆောင်နေတယ်လို့သိရပါတယ်။