ပြည်သူလူထု၏ အားပေးမှု၊ ထောက်ခံမှု၊ ပူးပေါင်းပါဝင်မှုများက လက်ရှိတော်လှန်ရေးအောင်ပွဲကို သယ်ဆောင်လာမည်ဖြစ်ပြီး ၂၀၂၂ တွင် ပြည်သူလူထုပေးဆပ်ခဲ့ရသည်များနှင့်ထိုက်တန်သည့် အောင်မြင်မှုကို သယ်ဆောင်လာမည်ဟုယုံကြည်ကြောင်း အမျိုးသားညီညွတ်ရေးအစိုးရ(NUG) နိုင်ငံခြားရေးဝန်ကြီး ဒေါ်ဇင်မာအောင်က ပြောသည်။
ယမန်နေ့ညပိုင်းက ပြုလုပ်ခဲ့သော ‘The Power of Revolution’ (တော်လှန်ရေး၏စွမ်းအား) စကား ဝိုင်းတွင် ဝန်ကြီးဒေါ်ဇင်မာအောင်က ထည့်သွင်းပြောကြားခြင်းဖြစ်ပြီး ၂၀၂၁ အတွင်း မြန်မာပြည်သူများသည် ကြံ့ကြံ့ခံနိုင်စွမ်းဖြစ်မှု၊ စိတ်ပိုင်းဖြတ်နိုင်စွမ်းဖြစ်မှုတို့ကို ပြသခဲ့သည်ဟုလည်း ပြောသည်။
“၂၀၂၂ ဟာ ဒီတော်လှန်ရေးမှာ ပေးဆပ်ရတာတွေနဲ့ ထိုက်တန်တဲ့ အောင်မြင်မှုကို သယ်ဆောင်လာမယ့် တော်လှန်ရေးဖြစ်တယ်။ အဲဒီတော်လှန်ရေးမှာ ကျွန်မတို့ ပြည်သူလူထုနဲ့ အတူတကွ၊ အောင်ပွဲဆင်ကြလိမ့်မယ်။ ၂၀၂၂ ကို အောင်ပွဲကို သယ်ဆောင်နိုင်မယ့်၊ ပြည်သူလူထု ပေးဆပ်ရ ကျိုးနပ်တဲ့ ပေးထားသမျှ ပြန်ရအောင်ယူနိုင်မယ့်နှစ်တစ်နှစ်ဖြစ်အောင်လို့ ကျွန်မတို့ ဝိုင်းဝန်းပြီး အတူတကွ ကြိုးစားကြပါမယ်” ဟု ဝန်ကြီးဒေါ်ဇင်မာအောင်က ဆိုသည်။
နိုင်ငံတကာအသိုင်းအဝိုင်းက အကြမ်းဖက်စစ်ကောင်စီကို တရားဝင်မှုမပေးဘဲ လက်မခံသည်မှာ ပိုမိုထင်ရှားလာပြီး အမျိုးသားညီညွတ်ရေးအစိုးရကို တရားဝင်အသိအမှတ်ပြုနိုင်ရေးအတွက် ကြိုးပမ်းလုပ်ဆောင်နေကြောင်း NUG နိုင်ငံခြားရေးဝန်ကြီးက ရှင်းပြသည်။
Public Service Announcement
နိုင်ငံတကာအသိုင်းအဝန်း၊ အစိုးရများနှင့် NUG တို့ တွေ့ဆုံဆွေးနွေးမှုများသည် ရာနှင့်ချီရှိခဲ့ သော်လည်း သံတမန်ရေးအခြေအနေအရ အများပြည်သူသိရှိစေရန် သတင်းထုတ်ပြန်မှုက ဆယ်ဂဏန်းခန့်သာရှိသည်ဟု ၎င်းက ဆိုသည်။
မြန်မာ့နွေဦးတော်လှန်ရေးခရီး လက်ရှိအခြေအနေရောက်ရှိလာခြင်းသည် ပြည်သူတစ်ဦးတစ် ယောက်ချင်းစီတိုင်း၏ပါဝင်မှုကြောင့်ဖြစ်ပြီး ထိုသို့ရုန်းကန်မှုကို နိုင်ငံတကာက လေးစားလာ စေရန်၊ ကူညီလာစေရန် ကြိုးစားဖန်တီးနေကြောင်းလည်း ဒေါ်ဇင်မာအောင်က ပြောသည်။
