မကွေးတိုင်း မင်းဘူးမြို့နယ် စကုမြို့ရဲစခန်းမှူး နေအိမ်ကို ဒေသခံပြောက်ကျားတပ်ဖွဲ့က သတိပေးသည့်အနေဖြင့် လက်ပစ်ဗုံးဖြင့် ပစ်ခတ်တိုက်ခိုက်ခဲ့ပြီး လူထိခိုက်မှုမရှိကြောင်း ဒေသခံတစ်ဦးက ပြောသည်။
ယနေ့(ဇန်နဝါရီ ၁ရက်)ညပိုင်းတွင် စကုရဲစခန်းရှိ စခန်းမှူးနေအိမ်ခြံဝန်းအတွင်း လက်ပစ်ဗုံးနှစ်လုံးဖြင့် ပစ်သွား ခြင်းဖြစ်သည်ဟု ဆိုသည်။
“စခန်းမှူးကတော့ သိတဲ့အတိုင်းပဲလေ။ နယ်မြေအပေါ် မထင်ရင် မထင်သလိုဖမ်း တပ်ချင်တဲ့ ပုဒ်မတွေ တပ်တဲ့အပေါ် ဒေသခံပြောက်ကျားတပ်ဖွဲ့တွေက သတိပေးတဲ့အဆင့်ပဲရှိပါသေးတယ်။ ဟိုလို လူထိခိုက် အောင်လုပ်တာမျိုးမရှိပါဘူး”ဟု ဒေသခံ တစ်ဦးက ပြောသည်။
ယနေ့နံနက် အစောပိုင်းတွင် ပွင့်ဖြူမြို့နယ်ရှိ အခွန်ရုံး၌လည်း ဗုံးပေါက်ကွဲမှု ဖြစ်ပွားခဲ့ရာ အဆောက်အအုံနှင့် တံခါးအချို့ပျက်စီးခဲ့ကြောင်း ၎င်းကဆိုသည်။
ထို့ပြင် ပွင့်ဖြူမြို့နယ် ရွေဘိုကျေးရွာရှိ ရာအိမ်မှူးနေအိမ်၌လည်း ဗုံးဖြင့်တိုက်ခိုက်ခံရကြောင်း အဆိုပါ ဒေသခံက ပြောသည်။
အဆိုပါ တိုက်ခိုက်မှုတွင်လည်း လူထိခိုက်မှုမရှိကြောင်း၊ လူထုအပေါ် ဖိနှိပ်ပြီး အခွန်ကောက်နေသည့် အခွန်ရုံးနှင့် စစ်ကောင်စီလက်ပါးစေရာအိမ်မှုးတို့ကို သတိပေးသည့် အဆင့်သာဖြစ်ကြောင်း ၎င်းက ဆိုသည်။