ရွှေဘိုမြို့နယ် ဆိပ်ခွန်ကျေးရွာသို့ လျှပ်စစ်မီတာခများလာကောက်သည့် စစ်ကောင်စီယာဥ်တန်းအား မိုင်းခွဲတိုက်ခိုက်ခဲ့ကြောင်း မြို့ပြပျောက်ကြားတပ် Snake Eye – PDF(Shwebo)က ယနေ့(ဇန်နဝါရီ ၅)ထုတ်ပြန် သည်။
ယနေ့နံနက်ပိုင်းတွင် စစ်ကောင်စီတပ်နှင့် ၎င်း၏ လက်ပါးစေများ ဆိပ်ခွန်ရွာသို့ ကားသုံးစီးဖြင့် မီတာခလာကောက်ပြီးအပြန်လမ်းတွင် ရှေ့ထွက်မိုင်း သုံးလုံး၊ ပဒေသာမိုင်း ခြောက်လုံးဖြင့် ဖောက်ခွဲတိုက်ခိုက်ခဲ့ခြင်းဖြစ်သည်ဟု Snake Eye – PDF မှ တာဝန်ရှိသူ တစ်ဦးက ပြောသည်။
“ဒီနေ့မနက်က ရွာထဲကို မီတာခလာကောက်တာပါ။ ကားသုံးစီးနဲ့။ မီတာခကောက် အပြန်မှာကျွန်တော်တို့က မိုင်းဆွဲလိုက်တာပါ”ဟု ၎င်းက ဆက်ပြောသည်။
တိုက်ခိုက်မှုကြောင့် စစ်ကောင်စီတပ်မှ ယာဥ်သုံးစီးတွင် နှစ်စီးမိုင်းထိခဲ့ပြီး ထိခိုက်သေဆုံးမှုရှိနိုင်သော်လည်း အတိအကျမသိရသေးဟု အထက်ပါတာဝန်ရှိသူက ဆိုသည်။
အထက်ပါတိုက်ခိုက်မှုကို SNAKE EYES-PDF၊ C&T(Shwebo)နှင့် SHWEBO GHOSTS စသည့် မဟာမိတ်(၃)ဖွဲ့မှ ပူးပေါင်းတိုက်ခိုက်ခဲ့ခြင်း ဖြစ် သည်။
စစ်ရေးတိုက်ခိုက်များပြုလုပ်နေချိန် ပြည်သူများအနေဖြင့် မသင်္ကာစရာယာဥ်တန်းများနှင့် ခပ်ခွာခွာမောင်းနှင်ကြရန်၊ မစ်ရှင်ဖြစ်ပွားနေစဥ် ဘေးအန္တရာယ်ဖြစ်ပွားစေနိုင်သောကြောင့် ဘေးကင်းရာတွင် အချိန်တစ်ခုထိစောင့်ဆိုင်းရပ်နားပေးကြရန် မဟာမိတ်ညီနောင်များကမေတ္တာရပ်ခံထားသည်။