အာဏာသိမ်းစစ်ကောင်စီတပ်က ဖမ်းဆီးသတ်ဖြတ် ၍ မကွေးတိုင်း ဂန့်ဂေါမြို့နယ် နှမ်းခါးရွာခံငါးဦးသေဆုံးပြီး နှစ်ဦးဖမ်းခံခဲ့ရကြောင်းနှင့် စစ်ကောင်စီတပ်က အကြိမ်ကြိမ်ဝင်ရောက်မီးရှို့ခဲ့၍ ရွာရှိနေအိမ်၊ စပါးကျီ၊ နွားတင်းကုတ်အပါအဝင် အဆောက်အအုံ ၈၀ခန့်ပျက်စီးခဲ့ကြောင်း နှမ်းခါးလူငယ်အဖွဲ့က ယမန်နေ့တွင် ထုတ်ပြန် သည်။
စစ်ကောင်စီတပ်များသည် နှမ်းခါးရွာသို့ မတ်လ ၁၈ရက်မှစတင်ဝင်ရောက်ခဲ့ရာ လက်ရှိအချိန်ထိ ၁၇ကြိမ်ခန့် ဝင်ရောက်မွှေနှောက်ခဲ့ကြောင်း၊ ဒီဇင်ဘာ၁၇ရက်တွင် နှမ်းခါးရွာကို လေကြောင်းမှပင် တိုက်ခိုက်ခဲ့ကြောင်း ဖော်ပြထားသည်။
နှမ်းခါးရွာရှိ အပြည်မဲ့ပြည်သူအိမ်များကို စစ်ကောင်စီတပ်ဖွဲ့ဝင်များက မီးရှီု့ ဖျက်ဆီးခဲ့မှု ၅ကြိမ်ပြု လုပ်ခဲ့ရာ ပြာကျပျက်စီးခဲ့သော အပြည်မဲ့ပြည်သူများ၏နေအိမ် ၄၃လုံး၊ မီးဟပ်ပျက်စီးခဲ့ရသော နေအိမ် ၁၇လုံး၊ မီးရှို့ခဲ့၍ အပြည်မဲ့ပြည်သူများ ရှောင်တိမ်းနေထိုင်ရာ စစ်ဘေးရှောင်တဲ ငါးလုံး၊ ပြာကျပျက်စီးခဲ့သည့် စပါးတိုက် ရှစ်လုံးနှင့် နွားစာတိုက် လေးလုံးရှိခဲ့သည်ဟု နှမ်းခါးလူငယ်အဖွဲ့က ထုတ်ပြန်သည်။
ထို့ပြင် ရဲလှ၊ တော်ဝင်နှင့် သာလင်းရွာများသို့လည်း စစ်ကောင်စီတပ်က ဝင်ရောက်မွှေနှောက်ပြီး ယင်းကျေးရွာရှိ နေအိမ်အချို့ကို မီးရှို့ဖျက်ဆီးခဲ့ကြောင်း ဖော်ပြသည်။
Public Service Announcement
စစ်ကောင်စီတပ်သည် ဂန့်ဂေါမြို့နယ်ရှိ ကျေးရွာများသို့ ဝင်ရောက်စီးနင်းပြီး ဒေသခံများကို တိုက်ခိုက်သတ်ဖြတ်ဖမ်းဆီးခြင်းနှင့် နေအိမ်များ မီးရှို့ခြင်းများကို အကြိမ်ကြိမ်လုပ်ဆောင်ခဲ့သည်။ ဂန့်ဂေါဒေသခံများကလည်း စစ်တပ်အာဏာသိမ်းမှုကို ဆန့်ကျင်ပြီး စစ်ကောင်စီတပ်များကိုခုခံတိုက်ခိုက်မှုများ စဉ်ဆက်မပြတ်လုပ်ဆောင်လျက်ရှိသည်။
