ရန်ကုန်မြို့လယ် ကျောက်တံတားမြို့နယ် ပန်းဆိုးတန်းနှင့် ကမ်းနားလမ်းအနီး အကောက်ခွန်ဦးစီးဌာနရုံးတွင် ယနေ့(ဇန်နဝါရီ ၇ရက်) နေ့လယ် ၁၂နာရီခန့်က ဗုံးပေါက်ကွဲမှုများဖြစ်ပွားခဲ့ကြောင်း ဒေသခံများက ပြော သည်။
“အကောက်ခွန်ရုံးထောင့်နားက အပင်အောက်မှာ ဗုံးက ပေါက်တာပါ။ စစ်သားတွေ လာစစ်တဲ့အချိန်မှာ နောက်တစ်လုံး ထပ်ပေါက်တဲ့ အသံအကျယ်ကြီး ကြားလိုက်ရတယ်။ ရုံးနားမှာ ရပ်ထားတဲ့ ကားတစ်စီး လေကာမှန်နဲ့ တံခါးတွေထိသွားတယ်။ စစ်သားအချို့လည်း ထိခိုက်နိုင်တယ်။ လမ်းတွေပိတ်ပြီး စစ်နေတော့ ဘယ်သူမှသွားမကြည့်ရဲကြဘူး”ဟု ကျောက်တံတားမြို့နယ်နေ ပြည်သူတစ်ဦးက ပြောသည်။
လက်ရှိတွင် အကောက်ခွန်ရုံးအနီး ပန်းဆိုးတန်းလမ်းနှင့် ကမ်းနားလမ်းတို့ကို အကြမ်းဖက်စစ်ကောင်စီက လမ်းများပိတ်ဆို့၍ စစ်ဆေးနေသည်။
ပြီးခဲ့သည့်ရက်ပိုင်းကလည်း ပန်းဆိုးတန်းလမ်းပေါ်ရှိ အလယ်အလတ်အခွန်များရုံးအနီး ဗုံးပေါက်ကွဲမှု ဖြစ်ပွားခဲ့သေးသည်။
ကမ္ဘောဒီးယားဝန်ကြီးချုပ် ဟွန်ဆန် စစ်ခေါင်းဆောင်မင်းအောင်လှိုင်နှင့် တွေ့ဆုံရန် လာရောက်ချိန် ရန်ကုန်နှင့် မန္တလေးမြို့တို့၌ ယနေ့ (ဇန်နဝါ ရီ ၇ ရက်) နံနက်ပိုင်းက စစ်ကောင်စီလက်ပါးစေများရှိသည့် နေရာများတွင် ပေါက်ကွဲမှုများ ဖြစ်ခဲ့သည်။