စစ်ကိုင်းတိုင်း အရာတော် – ဝက်လက် နယ်စပ် မူးမြစ်ကူး သမရိုးတံတားအနီး အကြမ်းဖက်စစ် ကောင်စီတပ်ကို မိုင်းဆွဲတိုက်ခိုက်ရာ စစ်ကောင်စီတပ်မှ အရာရှိတစ်ဦး အပါအဝင် လေးဦးသေဆုံးကြောင်း ဝက်လက်မြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်သည်။
မိုင်းဆွဲတိုက်ခိုက်မှုဖြစ်စဥ်မှာ ဇန်နဝါရီ ၆ ရက် နံနက် ၉ နာရီခန့်တွင် ခြေလျင်စစ်ကြောင်းထိုးလာသည့် အင်အား ၄၀ ခန့်ပါသည့် စစ်ကောင်စီတပ်ကို ဝက်လက် ပကဖ
တပ်ရင်း(၁)က မိုင်းဆွဲတိုက်ခိုက်ခဲ့သည်။
“မိုင်းနှစ်လုံးစလုံးက ထိထိမိမိ ရှိခဲ့တယ်။အဲဒါကြောင့် သေဆုံးသူတွေရှိခဲ့တာ။နောက်ပြီး သေတာ အတည်ပြုလို့ရသလောက်ဆို ဗိုလ် တစ်ဦးလည်း ပါတယ်”ဟု ဝက်လက် ပကဖ ရဲဘော်တစ်ဦးက ပြောသည်။
မိုင်းဆွဲတိုက်ခိုက်ခံရပြီးနောက် စစ်ကူကားစောင့်ဆိုင်းနေသော စစ်ကောင်စီတပ်ဖွဲ့များက မိနစ်(၃၀)ခန့် ရမ်းသန်းပစ်ခတ်ခဲ့မှုများ ရှိခဲ့သည်။
ယမန်နေ့ နံနက် ၁၀ နာရီခွဲခန့်တွင် ဝက်လက်ဘက်မှ စစ်ကူလာသော စစ်ကောင်စီကားတစ်စီးကို ရွှေပန်းကုံးရွာနှင့် သမရိုးရွာကြားတွင် ဝက်လက်ပကဖ၊ တပ်ရင်း(၁)က ထပ်မံမိုင်းဆွဲတိုက်ခိုက်ခဲ့သည်။
ထိုဖြစ်စဥ်တွင် စစ်ကောင်စီတပ်မှ အသေအဆုံးထိခိုက်မှုကို မသိရသေးပေ။
တိုက်ပွဲအတွင်း ပြည်သူ့ကာကွယ်ရေးတပ်ဖွဲ့ဝင်များ ထိခိုက်မှုမရှိဘဲ ပြန်လည်ဆုတ်ခွာလာနိုင်ခဲ့ကြောင်း ထုတ်ပြန်ချက်က ဆိုသည်။