ပြည်သူအများစုစစ်ဘေးရှောင်နေရသော လွိုင်ကော်မြို့တွင် ဖောက်ထွင်းခိုးယူမှုများ ပြုလုပ်နေသည့် သူခိုးအဖွဲ့များအတွက် အသက်အာမခံချက် မရှိကြောင်း ကရင်နီ အမျိုးသားကာကွယ်ရေးတပ် KNDF က ယနေ့ (ဇန်နဝါရီ ၁၁ ရက်)က သတိပေးလိုက်သည်။
ပြည်သူများအနေဖြင့် စစ်ရှောင်ရသောအခါတွင်အရေးကြီးသော စာရွက်စာတမ်းအဖိုးတန်ပစ္စည်းများကိုသေသေချာချာသိမ်းထုတ်ယူဆောင်သွားကြရန်လည်း တိုက်တွန်းသည်။
စွန့်ခွာချန်ထားခဲ့သော အိုးအိမ်နေရာများကိုကာကွယ်စောင့်ရှောင့်ရမည်မှာ မိမိတို့ရဲဘော်များ၏ တာဝန်ဖြစ်၍ တတ်စွမ်းသမျှ ကာကွယ်သွားမည်ဟု KNDF က ကတိပြုသည်။
လက်ရှိ မသမာသူ သူခိုးများ၏ လှုပ်ရှားသောသတင်းရရှိပါကလည်းKNDFရဲဘော်များအား အမြန်ဆုံး ဆက်သွယ်ပေးရန်မေတ္တာရပ်ခံသည်။လက်ပူးလက်ကြပ် တွေ့ရှိပါက အသက်အာမခံချက်ရှိမည်မဟုတ်ဘဲ ထိရောက်စွာအရေးယူမည်ဟုလည်း ထပ်ဆင့်သတိပေးသည်။
Public Service Announcement
“နေရာတိုင်းမှာ အချောင်သမား တွေရှိနေသေးတာပါပဲ။ပစ္စည်းတွေကို သူလိုလို ငါလိုလို ဝင် ဝင်မ တာပေါ့။အဓိကတော့ မိုင်းလုံး တို့ ပန်ကန်း ဘက်တွေ က အဖြစ်များတယ်။မြို့ထဲ လည်း အဲဒီလို ဝင်ခိုးနေတာတွေ ရှိနေတယ်လို့ သိရတယ်”ဟု လွိုင်ကော်မြို့ခံလူမှုကူညီရေးအသင်းမှ တာဝန်ရှိသူတစ်ဦးက ပြောသည်။
ဇန်နဝါရီ ၇ ရက်ကစ၍ အကြမ်းဖက်စစ်ကောင်စီတပ်၏ လွိုင်ကော်မြို့တွင်း ထိုးစစ်ဆင်ခဲ့သောကြောင့် မြို့နေလူထု သောင်းနှင့်ချီ၍ ရန်ကုန် အပါအဝင် နီးစပ်ရာ မြို့များသို့ အရေးပေါ်စစ်ဘေးရှောင်နေရဆဲ ဖြစ်သည်။
