၂၀၂၀ ရွေးကောက်ပွဲတွင်မသမာမှုများရှိသည်ဟုဆိုကာ အလိမ်အညာစာရင်းများဖန်တီးရေးသားထားသည့် မဲစာရင်းစစ်ဆေးတွေ့ရှိချက်ဆိုသောစာအုပ်ကို ဘုန်းကြီးကျောင်းများသို့ ဖြန့်ဝေဝါဒဖြန့်ရန် အာဏာသိမ်းစစ်ကောင်စီကညွှန်ကြားထားသည်ဟုသံဃာတော်အချို့ကမိန့်ကြားသည်။
၂၀၂၀ပြည့်နှစ် ပါတီစုံဒီမိုကရေစီရွေးကောက်ပွဲ မဲမသမာမှု တရားမဲ့ပြုကျင့်မှုအပေါ် စစ်ဆေးတွေ့ရှိချက်အစီရင်ခံစာဟု အမည်ပေး ထားသော စာအုပ်ပေါင်း ၁၅၀၀၀ကို တိုင်းနှင့်ပြည်နယ်အနှံ့ရှိ ဘုန်းကြီးကျောင်းများနှင့် စာသင်တိုက်များသို့ သာသနာရေးဦးစီးဌာနမှတစ်ဆင့်အချိုးကျဖြန့်ဝေရန် အကြမ်းဖက်စစ်ကောင်စီကညွှန်ကြားထားခြင်းဖြစ်သည်။
“စာအုပ်တွေ ဝေမယ်လို့တော့ ကြားတယ်။ ဒါတွေက အလိမ်အညာတွေပဲ။ မဲလိမ်မဲခိုးတာက စစ်ကောင်စီပဲ။ ဒီလိုနည်းပဲ သိမ်းသွင်းလို့ရမယ်လို့ ထင်နေတာကိုက စစ်ကောင်စီ ညံဖျင်းတာပေါ်လွင်တယ်”ဟု ရန်ကုန်မြို့မှ သံဃာတော်တစ်ပါးက မိန့်သည်။
အဆိုပါဝါဒဖြန့်စာအုပ်များကို နိုင်ငံတော်အဆင့် ဆရာတော်ကြီးများအတွက် တစ်ပါးလျှင်တစ်အုပ် ၊တိုင်းနှင့်ပြည်နယ် သံဃာ့နယကအဖွဲ့တစ်ဖွဲ့လျှင် ၃ အုပ်၊ မြို့နယ်သံဃာ့နယကအဖွဲ့များအတွက်တစ်ဖွဲ့လျှင် ၂ အုပ်၊ ၂၅ ပါးနှင့်အထက် ပရိယတ္တိစာသင်တိုက်များအတွက် တစ်တိုက်လျှင် ၁ အုပ်၊ ၅၀ ပါးနှင့်အထက် ပရိယတ္တိစာသင်တိုက်များအတွက် တစ်တိုက်လျှင် ၂ အုပ်၊ ၁၀၀ ပါးနှင့်အထက် ပရိယတ္တိစာသင်တိုက်များအတွက် တစ်တိုက်လျှင် ၃ အုပ်၊ ဘုန်းတော်ကြီးကျောင်းများနှင့် သီလရှင်ကျောင်းများအတွက် တစ်ကျောင်းလျှင် ၁ အုပ် ခွဲဝေဖြန့်ချီရမည်ဟု၍ညွန်ကြားထားသည်ကို ပေါက်ကြားလာသောစာတွင်တွေ့ရသည်။
Public Service Announcement
စစ်ကောင်စီကလိမ်လည်ပြုစုထားသည့် မဲစာရင်းကို ဘုန်းကြီးကျောင်းများသို့ဝေရန်ကြိုးစားနေသော်လည်းပြည်သူ့ဘက်တွင် ရပ်တည်သော သံဃာတော်များကမူ စစ်ကောင်စီကို ဆန့်ကျင်နေသည်။ မန္တလေးမြို့တွင် သံဃသမဂ္ဂ သပိတ်စစ်ကြောင်း ဆရာတော်များ ဦးဆောင်ကာ ယနေ့ ဇန်နဝါရီလ ၂၀ ရက်ညတွင် အကြမ်းဖက် စစ်အာဏာရှင် တော်လှန်ရေး ညသပိတ်ပြုလုပ်ခဲ့သည်။
၂၀၂၀ ရွေးကောင်ပွဲတွင် မဲစာရင်းမှားယွင်းမှုများကို ရွေးကောက်ပွဲကော်မရှင်က သုံးကြိမ်တိုင် ပြင်ဆင်ခွင့်ပေးခဲ့ပြီး ၊စစ်တပ်နှင့် ပြည်ခိုင်ဖြိုးပါတီတို့၏ ဖိအားပေးနှောက်ယှက်မှုများ၊ကမ္ဘာကပ်ရောဂါကြားမှ ရွေးကောက်ပွဲကို အောင်မြင်စွာကျင်းပနိုင်ခဲ့သည်။ခြိမ်းခြောက်မှုနှင့် ကပ်ရောဂါကြားမှ ပြည်သူများက စံချိန်တင်မဲထွက်ပေးကာ ရွေးကောင်ပွဲနေ့တွင် အငြင်းပွားမှု အနည်းငယ်ဖြင့် အောင်မြင်စွာကျင်းပနိုင်ခဲ့သဖြင့် ပြည်တွင်းပြည်ပမှ ရွေးကောက်ပွဲစောင့်ကြည့်သောအဖွဲ့အားလုံးက လွတ်လပ်မျှတသောရွေးကောက်ပွဲဟု အသိ့အမှတ်ပြုခဲ့ကြသည်။ သို့သော် အာဏာလု စစ်ကောင်စီက မဲစာရင်းမှားယွင်းမှုများရှိသည်ဟု အကြောင်းပြပြီး အာဏာသိမ်းခဲ့ခြင်းဖြစ်သည်။
