ကရင်နီ(ကယား)ပြည်နယ် လွိုင်ကော်နှင့် ဒီးမော့်ဆိုမြို့နယ်ကြားတွင် ယနေ့ တိုက်ပွဲဆက်လက်ပြင်းထန်နေကြောင်း ဒေသခံတစ်ဦးက ပြောသည်။
ယနေ့ (ဇန်နဝါရီ ၂၄ရက်) ညနေပိုင်းတွင် စစ်ကောင်စီတပ်က ရဟတ်ယာဉ်ဖြင့် နာရီဝက်ကျော်ကြာ ပစ်ခတ်တိုက်ခိုက်ခဲ့သည်ဟု လွိုင်ကော်ဒေသခံက ပြောသည်။
“မနက်ခင်းကတည်းက တောက်လျှောက် တိုက်ပွဲပြင်းထန်နေတာ။ အခုလည်း ၆မိုင်နဲ့စံပြ၊ ပန်ကန်းတကြော အဲဒီဘက်တွေမှာ ရဟတ်ယာဉ်သုံးပြီး ဒီနေ့ညနေမှာ သူတို့ ပစ်သွားတယ်” ဟု ၎င်းကဆိုသည်။
စစ်ကောင်စီတပ်သည် လွိုင်ကော်တောင်ကွဲစေတီအနီးရှိ တောင်ကုန်းပေါ် နေရာယူ၍ တင့်ကားများဖြင့်လည်း ပစ်ခတ်နေကြောင်းသိရသည်ဟု လွိုင်ကော်ဒေသခံက ပြောသည်။
Public Service Announcement
ယခု ညနေ ၅နာရီ ၂၀မိနစ်အချိန်ထိ ပစ်ခတ်မှုများ ဆက်ရှိနေကြောင်း တိုက်ပွဲကြောင့် ထိခိုက်ကျဆုံးမှု အခြေအနေများကိုမူ မကြားရသေးကြောင်း၎င်းကဆက်ပြောသည်။
လွိုင်ကော်နှင့် ဒီးမော့ဆိုမြို့နယ်တို့တွင် ယခုလဆန်းမှစ၍ ကရင်နီဒေသ တော်လှန်ရေးတပ် ပူးပေါင်းအဖွဲ့နှင့် စစ်ကောင်စီအကြား တိုက်ပွဲများ ဆက်တိုက်ဖြစ်ပွားနေရာ စစ်ကောင်စီတပ်က လေကြောင်းအသုံးပြု တိုက်ခိုက်မှုများ မကြာခဏ ပြုလုပ်နေသည်။
