မုံရွာ-မန္တလေးလမ်းနှင့် ရွှေဘို-မန္တလေးလမ်းများအား ည၈နာရီမှ နံနက် ၄ နာရီအတွင်း သွားလာအသုံးပြုခြင်းမပြုရန် ပြည်သူ့ကာကွယ်ရေးအဖွဲ့များက ထပ်မံသတိပေးလိုက်ပြီး မလိုက်နာဘဲသွားလာပါက သွားလာသူတို့၏တာဝန်သာဖြစ်ကြောင်း ဒေသတွင်း ပြည်သူ့ကာကွယ်ရေးအဖွဲ့များက အသိပေးသည်။
တော်လှန်ရေးအောင်မြင်သည်အထိ ကျန်းမာရေးနှင့်ပတ်သက်သော အရေးကြီးကိစ္စရပ်များမှလွဲ၍ မုံရွာ-မန္တလေးလမ်းမကြီးအား ည ၈ နာရီမှ မနက် ၄ နာရီအတွင်း အသုံးပြုကြခြင်းကို ရှောင်ရှားပေးကြစေလိုကြောင်း People Defence Force (South Monywa)က ယမန်နေ့ ဇန်နဝါရီလ ၂၃ ရက်နေ့တွင် အသိပေးခဲ့သည်။
ယနေ့ (ဇန်နဝါရီလ ၂၄ ရက်နေ့)တွင်လည်း အဆိုပါကြေညာချက်၌ ကားမှန်မချဘဲသော်လည်းကောင်း၊ အမြန်မောင်းနှင်ခြင်းကိုလည်းကောင်း တွေ့မြင်ခဲ့လျှင် အကြမ်းဖက်စစ်ကောင်စီတပ်ကားဟုယူဆပြီး မိုင်းခွဲခြင်း ပစ်ခတ်တိုက်ခက်ခြင်းများ ပြုလုပ်သွားမည်ဟု ဖြည့်စွက်ထုတ်ပြန်သည်။
အလားတူ စစ်ကိုင်းမြို့နယ် ပြည်သူ့ကာကွယ်ရေးအဖွဲ့ကလည်း စစ်ကိုင်း-မုံရွာလမ်းပိုင်းနှင့် စစ်ကိုင်း-ရွှေဘိုလမ်းပိုင်းတွင် ခရီးသွားအိမ်စီးကားများ၊ Express ကားကြီးများ၊ ကုန်တင်ကားများ၊ ကျန်းမာရေးကားများ ည ၈ နာရီမှ နံနက် ၄ နာရီအထိ ဖြတ်သန်းခြင်းမပြုရန် နောက်ဆုံးအကြိမ်အဖြစ် မေတ္တာရပ်ခံ သတိပေးကြောင်း ယနေ့ဇန်နဝါရီလ ၂၄ ရက်နေ့တွင် ထုတ်ပြန်ကြေညာသည်။
ပိတ်ပင်ထားသည့် အချိန်အတွင်း ဖြတ်သန်းသွားလာပါက စစ်ကောင်စီတပ်ဖွဲ့ဟု သက်မှတ်မည်ဖြစ်ပြီး ဖြစ်ပေါ်လာမည့်အခြေအနေအရပ်ရပ်အား ဖြတ်သန်းသူ၏ တာဝန်သာဖြစ်ကြောင်း စစ်ကိုင်းမြို့နယ် ပြည်သူ့ကာကွယ်ရေးအဖွဲ့က သတိပေးသည်။
ကျန်းမာရေးနှင့်ပတ်သက်သော အရေးကြီးကိစ္စရပ်များကြောင့် မဖြစ်မနေ မုံရွာ-မန္တလေးလမ်းမကြီးအား အသုံးပြုမည်ဆိုပါက မည်သည့်ကားမဆို ကားမှန်များချ၍ သင့်တင့်သောအရှိန် (အမြန်မမောင်းပဲ) ဖြင့်သာ မောင်းနှင်သွားလာပေးကြစေလိုကြောင်း၊ မုံရွာ-မန္တလေးလမ်းမကြီးအား အသုံးပြုခြင်းဆိုသည်မှာ ကားများသာမက ဆိုင်ကယ်၊ ခြေလျင် အစရှိသည့် ခရီးသွားလာသောမည်သူမဆိုကို ဆိုလိုခြင်းဖြစ်ပြီးယခု ကြေငြာချက်သည် ယနေ့မှစ၍ တော်လှန်ရေးအောင်မြင်သည့်အချိန်အထိ ထုတ်ပြန်ခြင်းဖြစ်ကြောင်း People Defence Force (South Monywa)၏ ထုတ်ပြန်ချက်တွင် ဖော်ပြသည်။
စစ်ကိုင်းတိုင်း၊ မုံရွာ-မန္တလေးလမ်းမကြီးနှင့် ရွှေဘို-မန္တလေးလမ်းမကြီးများပေါ်တွင်အကြမ်းဖက်စစ်ကောင်စီ၏ကားများ မကြာခဏတိုက်ခိုက်ခံရလေ့ရှိပြီး ဇန်နဝါရီလ ၂၀ ရက်နေ့ ညနေ ၆ နာရီခန့်ကလည်း မုံရွာမြို့မှတောင်ဘက်သို့ထွက်ခွာလာသော အကြမ်းဖက်စစ်ကောင်စီကားနှစ်စီးကို ညီနောင်အဖွဲ့က မုံရွာ-ချောင်းဦးလမ်းပိုင်းတစ်နေရာ၌ မိုင်းဆွဲတိုက်ခိုက်ရာ အကြမ်းဖက်စစ်ကောင်စီ၏ လက်ကိုင်တုတ်အရာရှိတစ်ဦးအပါအဝင် ကားပိ၍ သေသူ၊ မိုင်းထိမှန်၍သေသူစုစုပေါင်း ၂၀ ကျော်သေဆုံးသည်ဟု PDFအဖွဲ့များက အသိပေးခဲ့သည်။