ယခု ၂၀၂၂ သည် မြန်မာ့နွေဦးတော်လှန်ရေး၏ အောင်ပွဲနှစ်ဖြစ်ရန် အမျိုးသားညီညွတ်ရေးအစိုးရ (NUG)က ကြိုးစားဆောင်ရွက်နေပြီး တော်လှန်ရေးအောင်မြင်သည့်နေ့တစ်ရက် ယခုနှစ်အတွင်း ရောက်ရှိမည်ဟု ခိုင်မာစွာယုံကြည်ကြောင်း နိုင်ငံခြားရေးဝန်ကြီး ဒေါ်ဇင်မာအောင်က ပြော သည်။
စစ်အာဏာသိမ်းမှု (၁)နှစ်ပြည့်အဖြစ် အမျိုးသမီးမဟာမိတ်အင်အားစုက ယနေ့(ဇန်နဝါရီ ၂၅ ရက်)ညပိုင်းတွင်ပြုလုပ်သည့် ‘နိုင်ငံသစ်ကို ရဲရဲတည်ဆောက်ကြ’ ဆွေးနွေးပွဲစကားဝိုင်းတွင် NUG နိုင်ငံခြားရေးဝန်ကြီးက ယင်းသို့ ထည့်သွင်းပြောကြားခြင်းဖြစ်သည်။
“ကျွန်မတို့ဟာ ဒီနှစ်အတွင်းမှာသာလျှင် အောင်မြင်မှုကို ရယူနိုင်လိမ့်မယ်လို့ ကျွန်မအနေနဲ့ ယုံကြည်ပါတယ်။ အဲဒီလိုမျိုးဖြစ်အောင်လို့လည်း တော်လှန်ရေးအင်အားစုတွေ အားလုံးနဲ့ ဟန်ချက်ညီအောင် NUG အနေနဲ့ ကြိုးစားဆောင်ရွက်နေပါတယ်လို့ ပြောချင်ပါတယ်”ဟု ၎င်းက ဆိုသည်။
၂၀၂၂ အတွင်း ပြည်သူလူထုနှင့် NUGတို့ အောင်ပွဲခံနိုင်မည့် နှစ်ဖြစ်စေရန် စီမံကိန်းရေးဆွဲဆောင် ရွက်နေပြီး ပြည်သူလူထု၏ အသံများ၊ ဝေဖန်မှုများ၊ အကြံပြုချက်များကိုလည်း နားထောင်ကာ အားနည်းချက်များကို အားသာချက်အဖြစ် ပြောင်းလဲလုပ်ဆောင်နေကြောင်း နိုင်ငံခြားရေးဝန်ကြီးက ရှင်းလင်းသည်။
Public Service Announcement
အထက်ပါ ဆွေးနွေးပွဲတွင်ပါဝင်သူ ဒေါက်တာတေဇာစန်းကလည်း ၂၀၂၂ သည် ပြည်သူလူထု အုပ်ချုပ်ခွင့်ရမည့်နှစ်ဖြစ်လာမည်ဟု ယုံကြည်ပြီး ပြည်သူလူထုအနေဖြင့် ပူးပေါင်းပါဝင်နိုင်သမျှသောကဏ္ဍအားလုံးတွင် နည်းလမ်းပေါင်းစုံဖြင့် ဆက်လက်ပါဝင်လုပ်ဆောင်ကြရန် တိုက်တွန်း သည်။
