မန္တလေးမြို့ အမရပူရမြို့နယ်ရှိ ခိုးဆိုးလုနှိုက်အဖွဲ့တစ်ဖွဲ့အား တိုက်ခိုက်နှိမ်နင်းခဲ့ကြောင်း မြို့ပြပြောက်ကျားတပ်ဖွဲ့ Mandalay Ranger Force(MRF)က ယနေ့(ဇန်နဝါရီ ၂၆) ထုတ်ပြန်သည်။
ယမန်နေ့ည ၁၀ နာရီခန့်တွင် အမရပူရမြို့နယ် ဆွယ်တော်အနီး နတ်ရေကန်ရပ်ကွက်ရှိ စစ်ကောင်စီလက်ပါးစေ ခိုးဆိုးလုနှိုက်လူမိုက်အဖွဲ့တစ်ဖွဲ့တည်ရှိရာ ခြံဝင်းတစ်ခုအတွင်းသို့ ဗုံးပစ်တိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြသည်။
“သူတို့ ဝန်းထဲထည့်ခဲ့တာ။ အဲရပ်ကွက်အခံမေးကြည့်တာ ရဲတွေနဲ့ပတ်သတ်တဲ့ခေါင်းဆောင်ပိုင်း ရှောတယ်သိရတယ်”ဟု MRF တပ်ဖွဲ့ဝင် ရဲဘော်တစ်ဦးက ပြောသည်။
အဆိုပါလူမိုက်အဖွဲ့သည် မန္တလေးပြည်သူများထံမှ ဆိုင်ကယ်များ လုယက်ခြင်း၊ လူကို ဓားဖြင့် ခုတ်ခြင်း၊ ခိုးဝှက်ခြင်း စသည့်ပြစ်မှုများကို ကျူးလွန်နေသည့် အဖွဲ့တစ်ဖွဲ့ဖြစ်ကြောင်းလည်း ၎င်းက ဆက်ပြောသည်။
စစ်တပ်အာဏာသိမ်းပြီးနောက် ခိုးဆိုးလုယက်မှုများ နိုင်ငံတစ်ဝန်း ပိုမိုဖြစ်ပွားလျက်ရှိရာမန္တလေးမြို့တွင် ပြီးခဲ့သည့်နှစ် ၂၀၂၁အတွင်း ဆိုင်ကယ်လုယက်ခံရမှုများ မကြာခဏဖြစ်ပွားသည့်အပြင် နေအိမ်များ ဖောက်ထွင်းခံရခြင်း၊ အနုကြမ်းဆီး ဓားပြတိုက်ခိုက်ခံရခြင်းအပါအဝင် အများအပြား ဖြစ်ပွားခဲ့သည်။