စစ်ကိုင်းတိုင်း၊မြောင်မြို့နယ်တွင်အကြမ်းဖက်စစ်ကောင်စီတပ်အား မိုင်းဆွဲတိုက်ခိုက်ရာ အနည်းဆုံးသုံးဦးသေဆုံးကာ ၂၀ ဦးထက်မနည်း ထိခိုက်ဒဏ်ရာရရှိကြောင်း Myaung Special People’s Defense Force – MSPDF မှ ဗိုလ်မုန်တိုင်းက People’s Spring သို့ပြောသည်။
မြောင်မြို့နယ် ကျောက်ရစ်ရဲစခန်းတွင် တပ်စွဲထားသည့် အကြမ်းဖက်စစ်တပ်ကို တစ်လကျော်ကြာ စောင့်ကြည့် တိုက်ခိုက်မှုများအနက် ယနေ့ (ဇန်နဝါရီ ၂၈ ရက်)နေ့လည်ပိုင်း တိုက်ခိုက်မှုမှာ အထိရောက်ဆုံးဖြစ်ကြောင်းလည်း ဗိုလ်မုန်တိုင်းက ပြောသည်။
ကျောက်ရစ်ရဲစခန်းမှ ထွက်လာသည့် အင်အား (၅၀) ခန့်ပါစစ်ကောင်စီ၏ ခြေလျင်တပ်ကို နဘက်တာ ရွာ အနီး ၌ မိုင်းသုံးလုံးဆွဲတိုက်ခိုက်ခဲ့ခြင်းဖြစ်သည်။
မိုင်းသုံးလုံးအနက် တစ်လုံးသည် စစ်ကောင်စီတပ်ခြေလျင်စစ်ကြောင်း၏ အလယ် ဗဟို တည့်တည့်၌ ပေါက်ကွဲ ခဲ့သဖြင့် စစ်ကောင်စီတပ်သားများ အထိနာခဲ့ရခြင်းဖြစ်သည်ဟု ဗိုလ်မုန်တိုင်းကရှင်းပြသည်။
Public Service Announcement
“တစ်ရွာဝင်တစ်ရွာထွက်စစ်ကြောင်းထိုးတာကို အရင်ကတည်းက ကျွန်တော်တို့ ကြားဖြတ်တိုက်တာတွေရှိခဲ့တယ်။ဒီလောက် မထိရောက်ခဲ့ဘူး။ ဒီနေ့ က တော်တော်ကို အခြေအနေကောင်းခဲ့တယ်။စစ်သားတွေ အလောင်းသုံးလောင်းကို ဖြစ်စဥ် အနီးမှာ မြှုပ်ထားတယ်လို့ လတ်တလောသိရတယ်။ဒဏ်ရာရတဲ့သူ ၂၀ ကျော်ကိုလည်း နဘက်တာ ရွာထဲထည့်ပြီး ကုနေတယ်ဆိုတာ အတိအကျ ရထားတယ်”ဟု ၎င်းကဆက်ပြောသည်။
ယနေ့တိုက်ခိုက်မှုကို 27 Revolution Forces (မြင်းခြံ)၊ Myaung Special People’s Defense Force – MSPDF နှင့် Myaung Generation Guerilla Force(MGGF)ညီနောင်မဟာမိတ်(၃)ဖွဲ့မှ တိုက်ခိုက်ခဲ့သည်ဟုလည်း အသီးသီးထုတ်ပြန်ထားသည်။
