■စစ်ကောင်စီက လုပ်ငန်းများ၊ ရုံးများဖေဖော်ဝါရီ ၁ ရက်ပိတ်လျှင် လိုင်စင်သိမ်းမည်ဟု ခြိမ်းခြောက်ထားပြီး၊ ရုံးနှင့် စက်ရုံများညနေသုံးနာရီရုံးဆင်းပေးရန်၊ စစ်ကောင်စီရုံးများ ၁၂ နာရီမှရုံးတက်ရန် ၊ ရန်ကုန်တွင်ထိုနေ့ ဆိုင်ကယ်များမဖမ်းရန်၊ စစ်ကောင်စီနှင့်နီးစပ်သောလုပ်ငန်းရှင်များက ဝန်ထမ်းများကို ဖိအားပေးခံဝန်ထိုးရန် စသောနည်းလမ်းမျိုးစုံဖြင့် ငြိမ်သက်ခြင်းသပိတ်ကို ဖျက်ဆီးရန်လုံးပန်းနေသည်။
ဖေဖော်ဝါရီ ၁ ရက်ပြည်လုံးကျွတ် ငြိမ်သက်ခြင်းသပိတ်ပြုလုပ်မည့် အစီအစဥ်ကို ပျက်ပြားစေရန် အာဏာသိမ်းစစ်ကောင်စီက လုပ်ငန်းရှင်များ ၊စက်ရုံပိုင်ရှင် များအား ထိုနေ့လုပ်ငန်းများရုံးများမဖြစ်မနေဖွင့်ရန်နှင့် ညနေ သုံးနာရီခန့်တွင် စက်ရုံများ ၊ရုံးများမှ ဝန်ထမ်းများကို ပြန်ခိုင်းရန် ဖိအားပေး ၊ခြိမ်းခြောက် ညွန်ကြားထားကြောင်း စက်ရုံပိုင်ရှင်များက ပြောသည်။
ဒီမိုကရေစီလိုလားသူများက စစ်တပ်အာဏာသိမ်းမူ တစ်နှစ်ပြည့်သည့် ဖေဖော်ဝါရီ ၁ ရက်တွင် တနိုင်ငံလုံး အသံတိတ်သပိတ်ကို နံနက် ၁၀နာရီမှ ညနေ ၄နာရီအထိ ပြုလုပ်ရန် တိုက်တွန်းထားချိန်တွင် အကြမ်းဖက်စစ်ကောင်စီကတိတ်ဆိတ်ခြင်းသပိတ်မအောင်မြင်စေရန် နည်းမျိုးစုံဖြင့် ခြိမ်းခြောက်နေခြင်းဖြစ်သည်။
ထိုနေ့တွင် စက်ရုံ၊အလုပ်ရုံများပိတ်ပါက လိုင်စင် ပိတ်သိမ်းမည်ဖြစ်ကြောင်း ၊
ထိုနေ့တွင် ပုံမှန်အလုပ်ဆင်းချိန်စော၍ ညနေ ၃ နာရီတွင်ဆင်းခိုင်းပြီး အလုပ်ရှင်ဘက်မှ လျော့သွားသည့်အလုပ်ချိန်ကို နောင်ရက်မှ အစားထိုးပြန်ယူ၍ ဖေဖော်ဝါရီ ၁ ရက်တွင် ညနေ ၃ နာရီနောက်ပိုင်း လမ်းပေါ်တွင် လူရှိနေစေရန် ရန်ကုန်တွင်စက်ရုံများကို အစည်းအဝေးခေါ်ယူ၍ ဖိအားပေးနေကြောင်း စက်ရုံပိုင်ရှင်များ နှင့်ဝန်ထမ်းအချို့က ပြောသည်။
Public Service Announcement
“စက်ရုံတွေကို ၄နာရီမထိုးခင် ပြန်လွှတ်ဖို့ ဖိအားပေးတာရှိတယ်။ စက်ရုံပိုင်ရှင်အချို့ကတော့ သတ်မှတ်ချိန်မဟုတ်လို့ ပြန်မလွှတ်ချင်ဘူး”ဟု အလုပ်သမားတစ်ဦးကပြောသည်။
ထိုအပြင် ရန်ကုန်တွင် ဆိုင်ကယ်စီးလျှင် စစ်ကောင်စီတပ်က ဖမ်းဆီးအရေးယူသော်လည်း ထိုနေ့တွင် လမ်းပေါ်၌ လူများ၊ယာဥ်များ ရှိစေလိုသည့်အတွက် ဖေဖော်ဝါရီ ၁ ရက်တွင် ရန်ကုန်၌ ဆိုင်ကယ်များကိုမဖမ်းရန် ညွန်ကြားထားကြောင်းလည်း ယာဥ်ထိန်းရဲတစ်ဦးက ပြောသည်။
တရုတ်နှစ်သစ်ကူးနေ့ဖြစ်သည့် ဖေဖော်ဝါရီ ၁ ရက်တွင် မပိတ်ရန်နှင့် ပိတ်ပါက လုပ်ငန်းလိုင်စင်သိမ်းမည်ဟုလည်း ခြိမ်းခြောက်ထားသဖြင့် တရုတ်လုပ်ငန်းရှင်များလည်း ဒုက္ခရောက်နေကြောင်းလုပ်ငန်းရှင်တစ်ဦးက ပြောသည်။
သို့သော်လည်း အကြမ်းဖက်စစ်ကောင်စီတပ်နှင့်ပတ်သတ်သည့် လုပ်ငန်းရှင်အချို့က တက်တက်ကြွကြွလိုက်နာဆောင်ရွက်ပေးရန် ရှိနေသည်ဟု အဆိုပါကုမ္ပဏီများ၏ ဝန်ထမ်းများနှင့်လုပ်ငန်းရှင်အချို့ထံမှလည်းသိရသည်။
စစ်ကောင်စီခန့်အပ်ထားသည့် ဝန်ကြီး ဦးကိုကိုလှိုင်နှင့် ညီအစ်ကို တော်စပ်သည့် ဦးကျော်ကျော်လှိုင်ပိုင်ဆိုင်သည့် Smart ကုမ္ပဏီများအုပ်စုက ၎င်းတို့၏ဝန်ထမ်းများကို အသံတိသပိတ်လုပ်ခြင်း၊လက်ခုပ်တီးသပိတ်ပြုလုပ်ခြင်းအပါအဝင်နိုင်ငံရေးနှင့်ပတ်သပ်၍ ဘာမျှမလုပ်ရန်ဟုဆိုကာ အကြမ်းဖက်စစ်ကောင်စီက ထုတ်ပြန်ထားသော အမိန့်များကို ဖတ်စေပြီး စည်းကမ်းလိုက်နာပါမည်ဟု ဝန်ထမ်းများကို ဖိအားပေး လက်မှတ်ထိုးခိုင်းနေကြောင်းဝန်ထမ်းများက ပြောသည်။
ထိုအပြင် စစ်ကောင်စီထိန်းချုပ်ထားသည့် ဌာနအချို့မှ Non CDMဝန်ထမ်းများကို နေလယ် ၁၂ နာရီမှသာရုံးတက်ရန်လည်း ညွန့်ကြားထားသည်ဟုလည်း ဝန်ထမ်းများထံမှ သိရသည်။
အကြမ်းဖက်စစ်ကောင်စီက ၂၀၂၂ဖေဖော်ဝါရီ ၁ ရက်တွင် ပြုလုပ်မည့် အသံတိတ်သပိတ်ကို ပျက်စီးစေရန် ဈေးဆိုင်များ အတင်းအဓမ္မဖွင့်ရန် ခြိမ်းခြောက်နေပြီး၊ ဆိုင်ပိတ်ရန် စီစဉ်နေသည့် ဆိုင်များကို ချိတ်ပိတ်ခြင်း ၊ဖမ်းဆီးခြင်း၊ စစ်ကောင်စီက ဦးဆောင်၍ ပြိုင်ပွဲများပြုလုပ်ခြင်း၊ စစ်ကောင်စီထောင်ခံသူများကို ဆန္ဒထုတ်ဖော်စေခြင်းစသဖြင့်နည်းလမ်းပေါင်းစုံဖြင့်ဆောင်ရွက်နေသည်။
