CDM ပြုလုပ်ရန် ကြိုးပမ်းနေသူ အများအပြားရှိဟု CDM တပ်သားပြော
ရေစကြိုမြို့နယ်ရှိ တပ်ရင်း(၂၅၈)မှ တပ်သားအာဘဲလက် သည် MA-2 (၁)လက်၊ ကျည်ဗောက်( ၅) ခု ၊ကျည်(၁၃၅)တောင့်နှင့်အတူ အကြမ်းဖက်စစ်ကောင်စီတပ်အား CDM ပြုလုပ်ကာ ၎င်းတို့ထံ အလင်းဝင်ပူးပေါင်းလာကြောင်း ရေစကြိုမြို့နယ် ပြည်သူကာကွယ်ရေးတပ်ဖွဲ့က ယနေ့(ဇန်နဝါရီ ၃၁)တွင် ထုတ်ပြန်သည်။
အဆိုပါ CDM စစ်သားအား ရေစကြိုမြို့နယ် ပြည်သူကာကွယ်ရေးတပ်ဖွဲ့မှ လွတ်မြောက်နယ်မြေသို့ ပို့ဆောင်ပေးခဲ့သည်။
“မနေ့က(ဇန်နဝါရီ ၃၀ ရက်)ကဝင်လာတာပါ။ဒီနေ့တော့ လွတ်မြောက်နယ်မြေကို ပို့လိုက်နိုင်ပါပြီ။ဒီ CDM စစ်သားတစ်ဦး အပါအဝင်နဲ့ဆို ရေစကြိုပြည်သူ့တပ်ဖွဲ့ထံ လာပူးပေါင်းတဲ့ အကြမ်းဖက်စစ်ကောင်စီလက်အောက်ခံ စစ်သားခုနှစ်ဦး ရှိသွားပါပြီ”ဟု ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ခေါင်းဆောင် ကိုဝေယံက လူထုနွေဦးသို့ ပြောသည်။
Public Service Announcement
ထို့အပြင် ယမန်နေ့က လာရောက်ပူးပေါင်းသည့် စစ်ကောင်စီတပ်သား၏ ပြောဆိုချက်အရ အခြေ အနေအမျိုးမျိုးကြောင့် တပ်ထဲမှ ထွက်မပြေးနိုင်သေးသော်လည်း ပြည်သူ့တပ်ဖွဲ့များနှင့် ပူးပေါင်းရန် ကြိုးစားနေသူအများအပြားကျန်ရှိနေသည်ဟုလည်း ၎င်းက ဆိုသည်။
အကြမ်းဖက်စစ်ကောင်စီအား CDM ပြုလုပ်ကာ ပြည်သူရင်ခွင်ခိုလှုံချင်သူများအား ရေစကြိုမြို့နယ်ပြည်သူ့ကာကွယ်ရေးတပ်ဖွဲ့မှ ကြိုဆိုလက်ခံ၍ လွတ်မြောက်နယ်မြေသို့ တာဝန်ယူပို့ဆောင်ပေးမည်ဖြစ်ကြောင်း ပြည်သူ့စစ်သားများအား အသိပေးထားသည်။
