စစ်အာဏာရှင်တော်လှန်ရေး ကာလအတွင်း ကျဆုံးခဲ့သည့် ပြည်သူ ၁,၅၀၃ ဦးရှိခဲ့ပြီဖြစ်ကြောင်း နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP)က ထုတ်ပြန်သည်။
စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်ကို AAPPက ဖော်ပြရာ ဇန်နဝါရီ ၃၀ရက်အထိ ပြည်သူလူထုများ အသက်ဆုံးရှုံးရမှု အခြေအနေကို ဖော်ပြထားခြင်းဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအ သင်း(AAPP)မှ ကောက်ခံရရှိသည့် မှတ်တမ်းများအရ ယခင်နေ့ရက်များက ကျဆုံးသွားခဲ့သည့် ကယားပြည်နယ်၊ လွိုင်ကော်မြို့နယ်မှ အပြစ်မဲ့ပြည်သူလေးဦး၏ အချက်အလက်များကို ယနေ့(ဇန်နဝါရီ ၃၁ရက်)တွင် ရရှိခဲ့သည်ဟု ဆိုသည်။
ယနေ့တွင် ကျဆုံးခဲ့ရသူများကို အတည်ပြုနိုင်ခြင်းမရှိသေးသည့်အတွက် စစ်အာဏာရှင်တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယမန်နေ့အထိ ၁,၅၀၃ ဦးရှိခဲ့ပြီဖြစ်ကြောင်း၊ အဆိုပါအရေအတွက်သည် AAPP မှ ကောက်ယူရရှိထားသည့် အရေအတွက်ဖြစ်ပြီး အမှန်တကယ် ကျဆုံးသွားသူများမှာ အဆိုပါအရေအတွက်ထက် ပိုများနေနိုင်ကြောင်း ထုတ်ပြန်သည်။
AAPP၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ (ဇန်နဝါရီ ၃၁ ရက်)အထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း ၈,၈၃၅ဦးရှိပြီး ၎င်းတို့အနက်မှ ၆၆၁ဦး မှာ ထောင်ဒဏ်ချမှတ်ခြင်းခံထားရကြောင်း၊ ထိုပြစ်ဒဏ်ကျခံရသူထဲမှ အသက် ၁၈နှစ်အောက် ကလေးနှစ်ဦး အပါအဝင် ၄၅ဦးမှာ သေဒဏ်ချမှတ်ခံထားရကြောင်း ဖော်ပြသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ ၁,၉၇၂ဦး၏ အမည်စာရင်းကိုလည်း သီးခြားဖော်ပြထားပြီး ၎င်းတို့အနက်မှ မျက်ကွယ် သေဒဏ်ချမှတ်ခြင်းခံထားရသူ ၃၉ဦးအပါအဝင် ၁၁၈ဦးမှာ မျက်ကွယ်ပြစ်ဒဏ်ချမှတ်ခြင်းခံထားရကြောင်း၊ ထိုကြောင့် သေဒဏ်ချမှတ်ခံထားရသူ စုစုပေါင်း ၈၄ဦးရှိပြီဖြစ်သည်ဟုဆိုသည်။