ဖိနှိပ်မှုတွေရှိပေမယ့် အသံတိတ်သပိတ်ကို အနည်းဆုံးမြို့နယ်ပေါင်း ၁၉၀ ကျော်ပါဝင်ဆင်နွှဲခဲ့

အာဏာသိမ်းတစ်နှစ်ပြည့်အနေနဲ့ စစ်အာဏာရှင်ဆန့်ကျင်ရေး အသံတိတ်သပိတ်ကိုဆင်နွှဲရာမှာ မြို့ပေါင်း အနည်းဆုံး ၁၉၁ မြို့ပါဝင်ခဲ့ကြတယ်လို့အချက်အလက်တွေအရသိရပါတယ်။

ဒီစာရင်းဟာ Data for Myanmar အဖွဲ့က ဒီနေ့ ညနေ ၆ နာရီအထိ ပြုစုထားတဲ့စာရင်းဖြစ်ပါတယ်။ စာရင်းမှာလက်လှမ်းမမီလို့ ချန်ထားခဲ့ရတဲ့မြို့နယ်တွေလည်းရှိတယ်လို့အဲဒီအဖွဲ့ကဆိုထားပါတယ်။

ဒီနေ့မှာပြုလုပ်တဲ့အသံတိတ်သပိတ်ဟာ သပိတ်မစခင်ရက်ပိုင်းအလိုမှာကတည်းက ပျက်စီးအောင် စစ်ကောင်စီဟာ နည်းမျိုးစုံသုံးခဲ့တာပါ။

ဈေးဆိုင်တွေ ဖွင့်အောင်ခံဝန်ထိုးခိုင်းတာ ၊ အွန်လိုင်းကလှုံဆော်သူတွေကိုဖမ်းဆီးတာ ၊ သပိတ်ကျင်းပမယ့်နေ့မှာလမ်းပေါ်လူရှိနေအောင်ပွဲလမ်းသဘင်တွေကျင်းပတာ ၊တပ်ထောက်ခံတွေ လုပ်တာ စတဲ့ နည်းလမ်းစုံနဲ့ကို လုပ်ဆောင်ခဲ့တာတွေ့ရပါတယ်။

Public Service Announcement

ဒါပေမယ့် သပိတ်စတင်ချိန် မနက် ၁၀ နာရီကနေ ညနေ ၄ နာရီအတွင်းမှာတော့ ရန်ကုန် ၊မန္တလေး မြို့ကြီးတွေအပါအဝင် နိုင်ငံတဝှမ်းက မြို့နယ်တွေမှာလူသွားအလာကင်းမဲ့ပြီး ခြောက်ကပ်သွားပါတယ်။

စစ်အုပ်စုဟာ လုပ်တတ်သမျှ နည်းလမ်းတွေနဲ့အဆုံးစွန် ဟန့်တာနှောင့်ယှက် ခဲ့ပေမယ့် လူထုရဲ့သွေးစည်းညီညွှတ်မှု ၊တော်လှန်စိတ် တွေကိုအရင်းတည်ကာ ကမ္ဘာအဆင့် မှတ်တမ်းတင်ရမယ့် သမိုင်းဝင်လူထုသပိတ်လှုပ်ရှားမှုကြီးကိုအပြည့်အဝ အောင်မြင်စွာ ဆင်နွှဲနိုင်ခဲ့တယ်လို့ သပိတ်ခေါင်းဆောင်တစ်ဦးဖြစ်တဲ့ ကိုတေဇာစန်းကပြောပါတယ်။

“ကျနော်တို့ ပြည်သူလူထုရဲ့ ဒီလို စုစည်းညီညွတ်မှု အင်အားနဲ့အတူ ခရီးဆုံးထိ ချီတက်ကြမယ်ဗျာ။ ဒီနေ့သပိတ်အောင်ပွဲသည်ပင် ကျနော်တို့ တော်လှန်ရေး အောင်ပွဲအတွက် အသေချာဆုံးသော အာမခံချက်ကြီးပါပဲ” လို့ ကိုတေဇာစန်းက ဆိုပါတယ်။

ဒီနေ့သပိတ်ဟာ ပြီးခဲ့တဲ့ အသံတိတ်သပိတ်တွေထက်ပိုမိုလေးနက်ပြီး တော်လှန်ရေးအောင်ပွဲအလားအလာအတွက် အဆုံးအဖြတ်ပေးနိုင်ခဲ့ပြီလို့လည်း သပိတ်အင်အားစုတွေကသုံးသပ်ကြပါတယ်။

စစ်ကောင်စီကတော့ ဖိနှိပ်မှုမျိုးစုံကို ဆက်သုံးနေဆဲဖြစ်ကာ သပိတ်အပြီး လက်ခုပ်တီးတယ်ဆိုကာ ရန်ကုန်မြို့လယ်မှာ ဖမ်းဆီးတာတွေလုပ်ခဲ့တာရှိပါတယ်။