ဒီမိုကရေစီလမ်းကြောင်းပေါ်ပြန်လည်ရောက်ရှိရေး ဆက်လက်လုပ်ဆောင်သွားမည်ထပ်လောင်း ကတိပြု
မြန်မာပြည်သူများနှင့်အတူရပ်တည်ကာ ဒီမိုကရေစီလမ်းကြောင်းပေါ်ပြန်လည်ရောက်ရှိရေး ဆက်လက်လုပ်ဆောင်သွားမည်ဟု အမေရိကန်နိုင်ငံခြားရေးဝန်ကြီး ဘလင်ကန်က ထပ်လောင်း ကတိပြုသည်။
လွန်ခဲ့သည့် တစ်နှစ်အာဏာသိမ်းချိန်ကစ၍ မြန်မာစစ်တပ်ကျူးလွန်သော လူမဆန်သည့်အကြမ်းဖက်မှုများကို ရင်ဆိုင်ကာ ဒီမိုကရေစီလမ်းကြောင်းပေါ်ပြန်လည်ရောက်ရှိရေး ကြိုးပမ်းနေသူ တက်ကြွလှုပ်ရှားသူများအား အမေရိကန်နိုင်ငံခြားရေးဝန်ကြီးက ဖေဖော်ဝါရီ ၃ ရက်တွင် အွန်လိုင်းမှတွေ့ဆုံဆွေးနွေးခဲ့သည်။
“လူ့အခွင့်အရေးကာကွယ်ဖို့၊ လူသားချင်းစာနာမှုအကူအညီတွေပေးဖို့၊ အားလုံးပါဝင်ပြီး ဒီမိုကရေစီမြှင့်တင်ရေးကိုယ်စားလှယ်တွေကို ကူညီထောက်ပံ့ဖို့ မြန်မာပြည်သူတွေအတွက် ဆက် လက်အလုပ်လုပ်မယ်ဆိုတာ နိုင်ငံခြားရေးဝန်ကြီးက ထပ်မံ ကတိပြုခဲ့ပါတယ်” ဟု အမေရိကန် နိုင်ငံခြားရေးဝန်ကြီးဌာနက ထုတ်ပြန်သည်။
Public Service Announcement
လူ့အခွင့်အရေးချိုးဖောက်မှုနှင့် ကျူးလွန်မှုများအဆုံးသတ်နိုင်ရေး၊ မတရားဖမ်းဆီးခံရသူအားလုံး ပြန်လွှတ်ပေးရေးနှင့် ဒီမိုကရေစီလမ်းကြောင်းပေါ် ပြန်လည်ရောက်ရှိရေးတို့အတွက် စစ် ကောင်စီကို ဖိအားပေးရန် ပစ်မှတ်ထားဒဏ်ခတ်အရေးယူခြင်းအပါအဝင် မြန်မာ့အကျပ်အတည်း ဖြေရှင်းနိုင်ရေး အမေရိကန်အစိုးရ၏ သံတမန်ရေးနှင့် စီးပွားရေးလုပ်ဆောင်မှုများကို မြန်မာတက်ကြွလှုပ်ရှားသူများအား ဝန်ကြီးဘလင်ကန်က ရှင်းပြခဲ့သည်ဟု ဆိုသည်။
ထို့အပြင် မြန်မာစစ်တပ်ဟာ ရက်စက်ကြမ်းကြုတ်မှုများကို အမေရိကန် နိုင်ငံခြားရေးဝန်ကြီးက မှတ်သားထားပြီး အဆိုပါတာဝန်ရှိသူများကို တာဝန်ခံမှုရှိစေရန် အရေးတကြီးလုပ်ဆောင်ရမည်ဟု အလေးပေးပြောကြားသည်။
