ပြည်ထောင်စုလွှတ်တော် တတိယအကြိမ်အစည်းအဝေးရွေးကောက်ခံအမတ် ထက်ဝက်ကျော်တက်ရောက်

ပြည်ထောင်စုလွှတ်တော် တတိယအကြိမ်အစည်းအဝေးကို အွန်လိုင်းစနစ်ဖြင့် ယနေ့(ဖေဖော်ဝါရီ ၅ ရက်)ခေါ်ယူကျင်းပရာ ရွေးကောက်ခံလွှတ်တော်ကိုယ်စားလှယ် ၆၄ ရာခိုင်နှုန်းခန့်တက် ရောက်ခဲ့ကြောင်း ပြည်ထောင်စုလွှတ်တော်ကိုယ်စားပြုကော်မတီ(CRPH)က ထုတ်ပြန် သည်။

၂၀၂၀ အထွေထွေရွေးကောက်ပွဲအနိုင်ရ ရွေးကောက်ခံ ပြည်ထောင်စုလွှတ်တော်ကိုယ်စားလှယ် ၄၄၆ဦး အနက် ယနေ့အစည်းအဝေးသို့ ၂၈၅ဦး တက်ရောက်ခဲ့ကြောင်း CRPHက ဆိုသည်။

အထက်ပါအစည်းအဝေးသို့ အမျိုးသားညီညွတ်ရေးအစိုးရအဖွဲ့ဝင်များ၊ နိုင်ငံတကာသံရုံးများမှ သံတမန်များ၊ နိုင်ငံတကာပါလီမန် အမတ်များ၊ ပါလီမန်ရေးရာ အဖွဲ့အစည်းများနှင့် ကျွမ်းကျင်သူများ၊ လွှတ်တော်အကူအညီပေးရေး မိတ်ဖက်အဖွဲ့အစည်းများက လေ့လာ သူများအဖြစ် တက်ရောက်ခဲ့သည်ဟု ထုတ်ပြန်သည်။

အစည်းအဝေးတွင် ခေတ်အဆက်ဆက် ဒီမိုကရေစီအရေးတော်ပုံများနှင့် နွေဦးတော်လှန်ရေးတွင် ကျဆုံးခဲ့သော သူရဲကောင်းများအား ဂုဏ်ပြုသောအားဖြင့် (၁) မိနစ်ငြိမ်သက်ခြင်း၊ ပြည်ထောင်စုလွှတ်တော်နာယက က အဖွင့်အမှာစကားပြောကြားခြင်း၊ NUG ယာယီသမ္မတ ဒူဝါလရှီးလက မိန့်ခွန်းပြောကြားခြင်း၊ NUG ပြည်ထောင်စုဝန်ကြီးချုပ် မန်းဝင်းခိုင်သန်းက မိန့်ခွန်း ပြောကြားခြင်းအပါအဝင် လွှတ်တော်လုပ်ငန်းစဉ်များကို လုပ်ဆောင်ခဲ့သည်ဟု ဆိုသည်။

Public Service Announcement

ထို့အပြင် ပြည်ထောင်စုလွှတ်တော် တတိယအကြိမ်အစည်းအဝေးက အတည်ပြုခဲ့သည့် ပြည်ထောင်စုလွှတ်တော်၏ ထုတ်ပြန်ချက်အား ဆက်လက်ထုတ်ပြန်သွားမည်ဟု ဆိုသည်။