အကြမ်းဖက်စစ်ကောင်စီတပ် အာဏာသိမ်းပြီးနောက်ပိုင်း ဖြစ်ပွားခဲ့သည့် တိုက်ပွဲနှင့်ပဋိပက္ခ ဖြစ်စဉ်များအတွင်း စစ်ကောင်စီတပ်သား ၈ထောင်ခန့် သေဆုံးပြီး ၂,၇၀၀ ကျော် ဒဏ်ရာရရှိ ခဲ့သည်ဟု အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက သတင်းထုတ်ပြန်သည်။
၂၀၂၁ ဇွန်လ ၁ရက်မှ ၂၀၂၂ ဇန်နဝါရီ ၃၁ရက်အထိ ၈လတာကာလအတွင်း စစ်ကောင်စီ တပ်သား သေဆုံးမှုနှင့် ထိခိုက်ဒဏ်ရာရရှိမှု၊ အရပ်သားသေဆုံး၊ ဒဏ်ရာရရှိမှု၊ အရပ်သား ဖမ်းဆီးထိန်းသိမ်းခံရမှု အခြေအနေများကို ကာကွယ်ရေးဝန်ကြီးဌာနက ဖော်ပြလိုက်ခြင်း ဖြစ်သည်။
အဆိုပါ ကာလအတွင်း စစ်ကောင်စီတပ်သား ၇,၉၅၁ ဦးသေဆုံးပြီး ၂,၇၈၆ ဦး ဒဏ်ရာရရှိခဲ့ ကြောင်း၊ အရပ်သားသေဆုံးသူ ၁,၆၀၄ ဦးရှိပြီး ၈၄၀ ဦးဒဏ်ရာ ရရှိခဲ့ကြောင်း၊ အရပ်သား ၄,၃၉၈ ဦး ဖမ်းဆီးခံခဲ့ရကြောင်း ထုတ်ပြန်သည်။
အဆိုပါ အချက်အလက်များကို သတင်းဌာနများနှင့် မြေပြင်မှ တိုက်ရိုက်ရရှိသော သတင်းအချက်အလက်များကို စုစည်းထားခြင်းဖြစ်ပြီး မြေပြင်တွင် ယခုထက် အရေအတွက် ပိုမိုနိုင်ကြောင်း ဖော်ပြထားသည်။
Public Service Announcement
