မကွေး-ကံပြားလမ်းရှိ စက်သုံးဆီဆိုင် မီးလောင်မှုဖြစ်ရာ ၂နာရီကျော်ကြာ မီးငြှိမ်းသတ်ခဲ့ရပြီး အမျိုးသားနှစ်ဦး ဒဏ်ရာရရှိခဲ့သည်။
ဖေဖော်ဝါရီ ၉ ရက် ညနေ ၆နာရီကျော်တွင် မကွေး-ကံပြားလမ်းပေါ်ရှိ စက်သုံးဆီရောင်းချသည့် အိမ်တစ်အိမ်၌ ဆီပေပါချစဥ် မီးပွင့်သွားရာမှ မီးလောင်မှု စတင်ခဲ့သည်ဟုသိရကြောင်း ယင်းနေရာသို့ သွားရောက်ကူညီ ခဲ့သည့် ရောင်စုံမေတ္တာလူမှုကူညီရေး အသင်းမှ တာဝန်ရှိသူ တစ်ဦးက ပြောသည်။
မီးလောင်သည့်နေရာအနီး၌ စက်သုံးဆီအရောင်းဆိုင်များရှိသည့်ပြင် ဂက်စ်အရောင်းဆိုင်များလည်းရှိသောကြောင့် ဂက်စ်အိုးပေါက်ကွဲမှုများလည်း ဖြစ်ကြောင်း ၎င်းက ဆိုသည်။
ယင်းမီးလောင်မှုကြောင့် မီးလောင်ဒဏ်ရာရရှိသူ နှစ်ဦးရှိပြီး ၎င်းတို့အသင်းက ကူညီပေးခဲ့ကြောင်း အထက်ပါတာဝန်ရှိသူက ပြောသည်။
“ပထမ တစ်ယောက်ဖြစ်စဥ်က မီးစလောင်တော့ မီးသတ်ဆေးဗူးနဲ့ငြိမ်းရင်း မနိုင်ပဲ လက်ကို မီးလောင်သွားပါတယ်ဒုတိယတစ်ယောက်က. လက်ပေါင်ရင်း တွေမီးလောင်ခံရတာပါ” ဟု ဒဏ်ရာရရှိသူများ၏ အခြေအနေကို ၎င်းက ပြောသည်။
အဆိုပါမီးလောင်မှုသို့ မကွေးမြို့အပါအဝင် အနီးအနားမှ မီးသတ်ယာဥ်များ လာရောက်မီးငြှိမ်း သတ်ခဲ့ရပြီး မီးသတ်ယာဥ် ၁၅စီးလာရောက်မီးငြှိမ်းသတ် ခဲ့ရကြောင်းမြန်မာနိုင်ငံမီးသတ်တပ်ဖွဲ့ က သတင်းထုတ်ပြန်ထားသည်။
မီးသတ်တပ်ဖွဲ့က ည ၈နာရီအချိန်ခန့်တွင် မီးငြှိမ်းသတ်နိုင်ခဲ့သည်ဟု သတင်းထုတ်ပြန် ထားသော်လည်း အပူရှိန်ကြောင့် မီးလောင်မှုများထပ်မံ၍ ဖြစ်ကြောင်း ဒေသခံများက ပြောသည်။