● စစ်ကောင်စီတပ်က ရန်ကြီးအောင်ရွာကို ပြည်သူ့စစ်မဖွဲ့လျှင် ရွာကိုမီးရှို့မည်ဟုခြိမ်းခြောက်နေ
ကလေးမြို့တောင်ပိုင်း ရန်ကြီးအောင်ကျေးရွာတွင် တပ်စွဲထားသည် အကြမ်းဖက်စစ်ကောင်စီတပ်စခန်းကို ဒေသခံကာကွယ်ရေးတပ်ဖွဲ့နှစ်ခုက ယနေ့(ဖေဖော်ဝါရီ၁၄ရက်) ဝင်ရောက်တိုက်ခိုက်ခဲ့ရာ အကြမ်းဖက်စစ်ကောင်စီတပ်သား ၅ဦးသေဆုံးခဲ့သည်ဟု CDF-KKGက သတင်ထုတ်ပြန်သည်။
ယနေ့ညနေ၆နာရီတွင် အကြမ်းဖက်စစ်ကောင်စီတပ်ကို ဒေသခံကာကွယ်ရေးတပ်များက လက်နက်ကြီး၊ လက်နက်ငယ်များဖြင့်ဝင်ရောက်တိုက်ခဲ့ပြီး အကြမ်းဖက်စစ်ကောင်စီတပ်ဘက်မှလည်း ပြန်လည်ခုခံ၍ တိုက်ပွဲ တစ်နာရီကြာဖြစ်ပွားခဲ့သည်ဟု ချင်းပြည်ကာကွယ်ရေးတပ်ဖွဲ့ -ကလေး-ကဘော်-ဂန့်ဂေါ (CDF-KKG)၏ထုတ်ပြန်ချက်တွင် ဖော်ပြထားသည်။
ထိုတိုက်ပွဲအတွင်း အကြမ်းဖက်စစ်ကောင်စီတပ်မှ ၅ဦးကျဆုံးပြီး ဒဏ်ရာရရှိသူများရှိသော်လည်း ဒေသခံကာကွယ် ရေးတပ်များဘက်မှအထိအခိုက် အကျအဆုံးမရှိခဲ့ဟု ပါရှိသည်။
Public Service Announcement
အကြမ်းဖက်စစ်ကောင်စီတပ်သည် ရန်ကြီးအောင်ကျေးရွာတွင် ဒေသခံများကို ပြည်သူစစ်ဖွဲ့ရန် ဖိအားပေးစည်းရုံးနေပြီး ဒေသခံများကိုလည်း ဖေဖော်ဝါရီ ၁၅ ရက်အတွင်း ရှောင်တိမ်းရန်နှင့် မလိုက်နာပါက မီးရှို့မည်ဟု ခြိမ်းခြောက်နေသည်ဟုလည်း သိရသည်။
ရန်ကြီးအောင်ကျေးရွာတွင် တပ်စွဲထားသည့် အကြမ်းဖက်စစ်ကောင်စီတပ်ကို ဖေဖော်ဝါရီ ၁၂ ရက်ကလည်း CDF-KKGနှင့် ရိန်းဂျားကလေးပြည်သူကာကွယ်ရေးတပ်တို့က ဝင်ရောက်တိုက်ခဲ့သည်။ ထိုနောက်စစ်ကောင်စီတပ်သည် ဖေဖော်ဝါရီ ၁၃ ရက် ည ၆နာရီခန့်တွင် စစ်ဘေးရှောင်များရှိရာကို လက်နက်ကြီးဖြင့် ၄ ကြိမ်ပစ်ခတ်ခဲ့သည်။
ဖေဖော်ဝါရီ ၄ရက်မှစ၍ ကလေးမြို့တောင်ပိုင်းတွင် ဒေသခံကာကွယ်ရေးတပ်များနှင့် အကြမ်းဖက်စစ်ကောင်စီတို့ကြားတိုက်ပွဲများ ပြင်းထန်နေခြင်းဖြစ်သည်။
