ထီးချိုင့်တွင် စစ်​ကောင်စီယာဥ်တန်းကို ၇ ​နေရာ၌ မိုင်းဆွဲတိုက်ခိုက် အများအပြားထိခိုက်​သေဆုံးနိုင်၊ ကားနှစ်စီးပျက်စီး

စစ်ကိုင်းတိုင်း ထီးချိုင့်မြို့နယ်တွင် အကြမ်းဖက်စစ်ကောင်စီတပ်၏ အစီး၃၀ကျော်ပါ ရိက္ခာယာဥ်တန်းကို ၇ နေရာတွင်မိုင်းဆွဲတိုက်ခိုက်ခဲ့ရာ စစ်​ကောင်စီတပ်ဖွဲ့ဝင် အများအပြားသေဆုံးနိုင်ကြောင်း Tigyaing Revolution-TR က အသိပေးသည်။

ယနေ့ (ဖေဖော်ဝါရီ၁၅ ရက်) နံနက် ၆နာရီခန့်မှစ၍ မိုးညှင်းဘက်မှ ဆင်းလာသော အကြမ်းဖက်စစ်ကောင်စီ၏ ရိက္ခာယာဉ်တန်း (၃၃)စီးကို ကျောက်အိုက်၊ဘိုတဲကုန်း၊အင်းတိန်၊အလယ်တော ၊ဆားတွင်း၊ပေါက်ကုန်းနှင့် ကျက်သရေချောင်း အနီးတဝိုက်တို့တွင် မိုင်း အလုံး(၂၀)ကျော် ၊နေရာအနည်းဆုံး(၇)နေရာတို့ မှ မိုင်းဆွဲတိုက်ခိုက်ရာ အများအပြား သေဆုံးနိုင်သလို ထိခိုက် ဒဏ်ရာရသူများလည်း များပြားနိုင်ပြီး ကား(၂)စီး မောင်းမရတော့ဘဲ ပျက်စီးခဲ့ကြောင်း ထီချုင့်​​တော်လှန်​ရေးအဖွဲ့အမည်ရ Tigyaing Revolution-TRက သတင်းထုတ်ပြန်သည်။

“အမြဲတက်လာတိုင်း ဆင်းလာတိုင်း တိုက်ခိုက်ပါတယ်။ မန္တလေး-တကောင်း- ထီးချိုင့် -အင်းတော် -မြစ်ကြီးနားလမ်းပေါ်မှာ ဖြစ်တာပါ”ဟု TR အဖွဲ့ တာဝန်ရှိသူက​ပြောသည်။

၎င်း အကြမ်းဖက်စစ်ကောင်စီတပ်များသည် ကွမ်းတုံရွာမှထွက်လာစဉ် ကားလမ်းတလျှောက် ရမ်းသမ်းပစ်ခတ်ခဲ့ရာ ဇီးဖြူကျင်း ၊အင်းတိန်၊အင်ကြင်းကုန်း ၊အလယ်တော ၊ရွာသစ်ကုန်း ၊တည်တောမှ နေအိမ်များ ကျည်ဆံ ၊ဗုံးဆံများ ထိမှန်ပျက်စီးခဲ့ပြီး ပြည်သူထိခိုက်မှုမရှိဟုသိ့ရသည်။ ထီးချိုင့် ကာကွယ်ရေး တပ်ပေါင်းစုများမှ ထိခိုက်ဒဏ်ရာရသူမရှိဘဲ အောင်မြင်စွာဆုတ်ခွာနိုင်ခဲ့ပြီး အကြမ်းဖက်စစ်ယာဉ်တန်းများသည် နံနက် ၁၀နာရီတွင် မန္တလေးသို့ ဆက်လက်ဆင်းသွားကြောင်း ထုတ်ပြန်ချက်တွင်ပါရှိသည်။

Public Service Announcement