တယ်လီနောမြန်မာကို မရောင်းချမီ အချက်အလက်များကို ဖျက်ပစ်ရန် နော်ဝေးအမတ်အကြံပြု
တယ်လီနောသုံးစွဲသူများ၏ အချက်အလက်များကို မြန်မာစစ်ကောင်စီသို့လွှဲပြောင်းမှုကို မတားဆီးနိုင်ကြောင်း နော်ဝေးစက်မှုဝန်ကြီးက ယနေ့(ဖေဖော်ဝါရီ ၁၆ရက်)ထုတ်ဖော်ပြောကြားသည်။
နော်ဝေးအစိုးရသည် တယ်လီနောမြန်မာကို စစ်အာဏာရှင်များသို့ရောင်းချရာတွင် သုံးစွဲသူများ ၏ အချက်အလက်များကို လွှဲပြောင်းမှုကို တားဆီးနိုင်မည်မဟုတ်ကြောင်း စက်မှုဝန်ကြီးက ပြောသည်။
နော်ဝေးအစိုးရက ရှယ်ယာအများစုပိုင်ဆိုင်သော တယ်လီနောသည် မြန်မာနိုင်ငံ၌ ၎င်း၏လုပ် ငန်းများကို စစ်အာဏာရှင်များကို ရောင်းချရာတွင် သုံးစွဲသူ ၁၈ သန်း၏ ကိုယ်ရေးအချက် အလက်များကို အာမခံရန်အချို့သောအဖွဲ့အစည်းဆိုင်ရာရင်းနှီးမြှုပ်နှံသူများနှင့် လူ့အခွင့်အရေးအဖွဲ့များ၏ ဖိအားပေးမှုကို ရင်ဆိုင်နေရသည်။
“မြန်မာနိုင်ငံရှိ လုပ်ငန်းခွဲ ဆက်သွယ်ရေးကုမ္ပဏီပိုင်ရှင်အနေနဲ့ သုံးစွဲသူအချက်အလက်တွေ မြန်မာစစ်ကောင်စီလက်ထဲ အပြီးသတ်ရောက်ရှိမှာကို မတားဆီးနိုင်ပါဘူး”ဟု စက်မှုဝန်ကြီး Jan Christian Vestre က နော်ဝေးလွှတ်တော်၌ ပြောကြားသည်။
တယ်လီနောမြန်မာကို ရောင်းချခြင်းသည် ဆိုးရွားမှုအနည်းဆုံးရလဒ်ဖြစ်သည်ဟု တယ်လီနောကုမ္ပဏီက ယုံကြည်ထားသည်ဟု ယင်းစက်မှုဝန်ကြီးက ပြောသည်။ စက်မှုဝန်ကြီးသည် တယ်လီ နောကုမ္ပဏီတွင် အစိုးရပိုင်ရှယ်ယာကို တာဝန်ခံစီမံကြီးကြပ်သူဖြစ်သည်။
မြန်မာစစ်အာဏာရှင်များက ပြည်တွင်းကုမ္ပဏီ ရွှေဗျိုင်းဖြူကို တယ်လီနောမြန်မာဝယ်ယူရန် ဆက်လက်လုပ်ပိုင်ခွင့်ပေးထားပြီး မကြာခင် အပြီးသတ်ရောင်းချမှုဖြစ်မည်ဟု Reuters က ပြီးခဲ့သည့်သီတင်းပတ်တွင် ရေးသားခဲ့သည်။
စစ်ကောင်စီလက်ထဲသို့ တယ်လီနောမြန်မာသုံးစွဲသူ ၁၈ သန်း၏ အချက်အလက်များ ရောက်ရှိနိုင်ဖွယ်ရှိနေမှုကို လူ့အခွင့်အရေးတက်ကြွလှုပ်ရှားသည့် အဖွဲ့အချို့က ကန့်ကွက်ဆန္ဒထုတ်ဖော်မှု အများအပြားပြုလုပ်ခဲ့ပြီး ရောင်းချမှုကို ရပ်တန့်ရန် တောင်းဆိုခဲ့ကြသည်။
နော်ဝေးဥပဒေပြုအမတ် Ola Elvestuen က တယ်လီနောသည် ရောင်းချမှုမပြီးခင် သုံးစွဲသူများ၏ အချက်အလက်များကို ဖျက်ဆီးပစ်သင့်ကြောင်း ပြောသည်။
“ကန့်ကွက်ဆန္ဒပြသူတွေနဲ့ ဒီမိုကရေစီအရေးတိုက်ပွဲဝင်နေသူတွေရဲ့ သဘောထားက ရှင်းပါတယ်။ အရေးကြီးဆုံးဆုံးဖြတ်ချက်က ဒီအချက်အလက်တွေကို ဖျက်ဆီးပစ်လိုက်ဖို့ပါပဲ” ဟု Elvestuen က Reuters သတင်းဌာနကို ပြောသည်။
တယ်လီနောပြောရေးဆိုခွင့်ရှိသူကမူ သုံးစွဲသူများ၏အချက်အလက်များကို ဖျက်ဆီးခြင်းသည် မြန်မာနိုင်ငံရှိ ဆက်သွယ်ရေးလိုင်စင်ကိုချိုးဖောက်ခြင်းဖြစ်မည်ဟု ပြောကြားထားသည်။