▪️၃ရက်ကြာအစည်းအဝေးတွင် မြန်မာ့အရေး အလေးထားဆွေးနွေးမည်
မြန်မာစစ်ကောင်စီတက်ရောက်ခွင့်မရှိသည့် အာဆီယံနိုင်ငံခြားရေးဝန်ကြီးများအစည်းအဝေးကို အလှည့်ကျဥက္ကဌနိုင်ငံ ကမ္ဘောဒီးယား၊ ဖနွမ်းပင်မြို့၌ ယနေ့ (ဖေဖော်ဝါရီ ၁၇ ရက်) နံနက်ပိုင်းတွင် စတင်ကျင်းပ သည်။
အဆိုပါအစည်းအဝေးကို ကမ္ဘောဒီးယား၊ အင်ဒိုနီးရှား၊ လာအို၊ စင်ကာပူ၊ မလေးရှား၊ ဘရူနိုင်း၊ ဗီယက်နမ်တို့က နိုင်ငံခြားရေးဝန်ကြီးများကိုယ်တိုင် တက်ရောက်ခဲ့ပြီး ထိုင်းနှင့် ဖိလစ်ပိုင်တို့က အွန်လိုင်းမှတစ်ဆင့် တက်ရောက်ခဲ့ကြသည်။
ယင်းအစည်းအဝေးကို ၃ရက်ကြာကျင်းပမည်ဖြစ်ကာ မြန်မာ့အရေးကို အလေးထားဆွေးနွေးမည်ဟု ဒေသတွင်းသတင်းဌာနများက ဖော်ပြသည်။
Public Service Announcement
အကြမ်းဖက်မြန်မာစစ်ကောင်စီသည် ယမန်နှစ်က ချမှတ်ခဲ့သော အာဆီယံ၏ဘုံဆုံးဖြတ်ချက် ၅ရပ်ကို အကောင်အထည်ဖော်ခြင်းမရှိ၍ နိုင်ငံရေးကိုယ်စားလှယ်မဟုတ်သူ(non-political representative)ကိုသာ အဆင့်လျှော့ချကာ အာဆီယံနိုင်ငံခြားရေးဝန်ကြီးများအစည်းအဝေးသို့ ဖိတ်ကြားခဲ့သည်။
ထိုသို့ အဆင့်လျှော့ချဖိတ်ကြားမှုကို အကြမ်းဖက်စစ်ကောင်စီက လက်မခံဘဲ နိုင်ငံရေးကိုယ်စားလှယ်မဟုတ်သူကို စေလွှတ်မည်မဟုတ်ဟု ထုတ်ပြန်ကြေညာခဲ့သည်။
အထက်ပါ အာဆီယံနိုင်ငံခြားရေးဝန်ကြီးများအစည်းအဝေးကို ပြီးခဲ့သည့် ဇန်နဝါရီက ကျင်းပရန် စီစဉ်ခဲ့သော်လည်း မြန်မာအကြမ်းဖက်စစ်ကောင်စီကို ဖိတ်ကြားရေးနှင့်ပတ်သက်၍ အဖွဲ့ဝင်နိုင်ငံများအကြား သဘောထားကွဲလွဲကာ မကျင်းပဖြစ်ခဲ့ပေ။
