လက်ရှိတွင် ချင်းတမျိုးသားလုံးသည် စစ်အာဏာရှင် စနစ်ချုပ်ငြိမ်းရေး၊ ချင်းနယ်မြေများ လွတ် မြောက်ရေးတို့အတွက် ပြတ်သားစွာခုခံတွန်းလှန်ကြရမည်ဖြစ်ကြောင်း ကြားကာလချင်းအမျိုးသား အတိုင်ပင်ခံကောင်စီ(ICNCC)က တိုက်တွန်းထုတ်ပြန်သည်။
ဖေဖော်ဝါရီ ၂၀ ရက်တွင် ကျရောက်မည့် (၇၄) နှစ်မြောက် ချင်းအမျိုးသားနေ့အတွက် ICNCC ၏ ထုတ်ပြန်ချက်တွင် ဖော်ပြခြင်းဖြစ်ပြီး စစ်အာဏာရှင် စနစ် မချုပ်ငြိမ်းသမျှကာလပတ်လုံး ချင်းလူမျိုးများအပါအဝင် နိုင်ငံသူ၊ နိုင်ငံသားများသည် လွတ်လပ်ခြင်း၊ တရားမျှတခြင်းနှင့် လုံခြုံငြိမ်းချမ်းခြင်းများကို ရရှိခံစားနိုင်မည့်အခြေအနေမရှိကြောင်း ICNCCက ပြောသည်။
လက်ရှိ လွတ်မြောက်ရေးတိုက်ပွဲများ ဆင်နွှဲရင်း ညီညွတ်သော ချင်းပြည်တည်ဆောက်ရေးကို စတင်ကြရမည်ဟု ICNCC က တိုက်တွန်းပြီး ညီညွတ်သော ချင်းပြည်အဖြစ် မစုစည်းနိုင်ပါက လက်ရှိဆင်နွှဲနေသော လွတ်မြောက်ရေးတိုက်ပွဲသည် အောင်မြင်ပြီးမြောက်နိုင်မည်မဟုတ်ကြောင်း တဆက်တည်း သတိပေးသည်။
ထို့အပြင် ချင်းပြည်နှင့် ချင်းလူမျိုးများသည် စစ်မှန်သော ဖက်ဒရယ်ဒီမိုကရေစီပြည်ထောင်စု ပီပြင်စွာ ပေါ်ထွန်းလာနိုင်ရေးအတွက် ပြည်ထောင်စုလွှတ်တော်ကိုယ်စားပြုကော်မတီ၊ အမျိုးသားညီ ညွတ်ရေးအစိုးရ၊ အမျိုးသားညီညွတ်ရေးအတိုင်ပင်ခံကောင်စီ၊ ပြည်ထောင်စုအဖွဲ့ဝင်ပြည်နယ်များ၊ နိုင်ငံသူ နိုင်ငံသားများနှင့် ဆက်လက်ပူးပေါင်းပါဝင်ကြိုးပမ်းရမည်ဟု ICNCC က ဆိုသည်။
Public Service Announcement
ယခုကဲ့သို့ ချင်းတမျိုးသားလုံးအတွက် ကြီးမားသည့်စိန်ခေါ်မှုများ ကြုံတွေ့ရင်ဆိုင်ကျော်ဖြတ်နေရ သည့်အချိန်တွင် ချင်းတမျိုးသားလုံး၏ စည်းလုံးညီညွတ်ရေးကို ခိုင်မာစွာတည်ဆောက်နိုင်ရန် အလေးအနက်တိုက်တွန်းပန်ကြားလိုကြောင်းလည်း ICNCC က ထုတ်ပြန်သည်။
