ကရင်နီအမျိုးသားများကာကွယ်ရေးတပ်ဖွဲ့ (KNDF) ပေးပို့သည့် ဝမ်းနည်းကြောင်း သဝဏ်လွှာလက်ခံရရှိကြောင်း မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA)က ထုတ်ပြန်သည်။
ကိုးကန့်ခေါင်းဆောင်ဖုန်ကြားရှင်သည် ဖေဖော်ဝါရီ ၁၆ရက်တွင် ကွယ်လွန်ခဲ့ခြင်းဖြစ်ပြီး KNDF ပေးပို့သော ဝမ်းနည်းကြောင်း သဝဏ်လွှာကို MNDAA၏ ပြန်ကြားရေးသတင်းဌာန The Kokangက ယနေ့ (ဖေဖော်ဝါရီ ၂၀ရက်) ထုတ်ပြန်ခြင်းဖြစ်သည်။
မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) ထူထောင်သူလည်းဖြစ်ပြီး ဥက္ကဌဟောင်းဖြစ်သူ ကိုးကန့်အမျိုးသားခေါင်းဆောင်ကြီး ဦးဖုန်ကြားရှင်သည် ၂၀၂၂ဖေဖော်ဝါရီ၁၆ ရက်တွင် လူကြီးရောဂါဖြင့် ကွယ်လွန်သွားကြောင်း ကြားသိရသဖြင့် ကျန်ရစ်သူမိသားစု၊ ကိုးကန့်အမျိုးသားများနှင့်အတူ ထပ်တူထပ်မျှ ဝမ်းနည်းရကြောင်း KNDF၏ သဝဏ်လွှာတွင် ပါရှိသည်။
ထို့အပြင် ဦးဖုန်ကြားရှင်သည် မြန်မာနိုင်ငံ၏ လွတ်လပ် ရေးခေတ်ဦး ပါလီမန်ခေတ်ကတည်းကပင် ကိုးကန့်စော်ဘွားကာကွယ်ရေးတပ် ခေါင်းဆောင်အဖြစ်လည်းကောင်း၊ ဗမာပြည်ကွန်မြူနစ်ပါတီ တပ်မှူးအဖြစ်လည်းကောင်း၁၉၈၉ ခုနှစ်မှစ၍ မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)သို့မဟုတ် ကိုးကန့်တပ်ဖွဲ့ကို ဖွဲ့စည်းထူထောင် ခေါင်းဆောင်ခဲ့ပြီး ကိုးကန့်အမျိုးသားတန်းတူရေးဒေသတိုးတက်ရေးအပြင် တစ်နိုင်ငံလုံး၏ အာဏာရှင်ဆန့်ကျင်ရေးကို ဘဝတသက်တာလုံး ကြိုးပမ်းခဲ့သူအဖြစ် လေ့လာမှတ်သားရပြီး အမြော်အမြင်ကြီးမားသော ခေါင်းဆောင်ကြီးတစ်ဦး အဖြစ် အလေးအနက်ဖြစ်ရပါသည်ဟု ပါရှိသည်။
တိုင်းရင်းသားတန်းတူ တရားမျှတရေးအမှန်တရားရေး နှင့် ဖက်ရယ်ဒီမိုကရေစီနိုင်ငံ တည်ထောင်ရေးတို့အတွက် မြန်မာအမျိုးသားဒီမိုကရက်တစ် မဟာမိတ်တပ်မတော် (MNDAA) နှင့်အတူ တတ်အားသရွေ့ ပူးပေါင်းလက်တွဲဆောင်ရွက်သွားမည်ဟုလည်း KNDFက ဆိုသည်။
Public Service Announcement
ကရင်နီအမျိုးသားများကာကွယ်ရေးတပ်ဖွဲ့ (KNDF) သည် ကရင်နီဒေသတွင် ပြည်သူကာကွယ်ရေးမဟာမိတ်တပ်များနှင့်အတူ အကြမ်းဖက်စစ်ကောင်စီကို တော်လှန်တိုက်ခိုက်နေပြီး MNDAAကလည်း ရှမ်းပြည်နယ်မြောက်ပိုင်းဒေသတွင် စစ်ကောင်စီအား အရှိန်မြှင့်တိုက်ခိုက်နေသည်။
