ယင်းမာပင်မြို့နယ်တွင် ဒေသခံအဘွားအိုတစ်ဦး၏နာရေးအခမ်းအနားပြုလုပ်နေသည်ကို PDF သင်တန်း ဆင်းပွဲဟုဆိုကာ အကြမ်းဖက်စစ်ကောင်စီက ရဟတ်ယာဉ် လေးစီးဖြင့် လာရောက်ပစ်ခတ်သဖြင့်ဒေသခံပြည်သူများ ထိခိုက်ဒဏ်ရာရရှိခဲ့ကြောင်း မြောက်ယမားပြည်သူကာကွယ်ရေးအဖွဲ့ ပြန်ကြားရေးတာဝန်ခံက ပြောသည်။
ယနေ့( ဖေဖေါ်ဝါရီ ၂၆ ရက်) နံနက်၉နာရီခန့်ကယင်းမာပင်မြို့နယ်၊ညောင်ကိုင်းနှင့် ချင်းပုန်းကျေးရွာပတ်ဝန်းကျင်ကို အကြမ်းဖက်စစ်ကောင်စီတပ်က လေကြောင်းမှ လာရောက်တိုက်ခိုက်ခဲ့ခြင်း ဖြစ်သည်။
“အဘွားတစ်ယောက်ဆုံးတာ။ ဘုန်းကြီးကို သွားပင့်နေချိန် လူစုလူဝေးပုံစံဖြစ်သွားတာကို ရယာတ်ယာဉ်လေးစီးနဲ့ လာပစ်တာ” ဟု ယင်းမာပင်အခြေစိုက် မြောက်ယမားပြည်သူကာကွယ်ရေးအဖွဲ့ ပြန်ကြားရေးတာဝန်ခံကပြောသည်။
“အမှန်ကအဲ့ဒီမှာ ကျွန်တော်တို့ PDF တွေ မရှိဘူး။ သင်တန်းလည်း မရှိဘူး”ဟု ၎င်းက ဆက်ပြောသည်။
အကြမ်းဖက်စစ်တပ်သည် ညောင်ကိုင်းတပ်နယ်ဆေးရုံတွင် တပ်စွဲထားပြီး ယခုကဲ့သို့ လာရောက်အကြမ်းဖက်တိုက်ခိုက်ခြင်းဟု ဒေသခံများက ပြောသည်။
အရပ်သားများထိခိုက်ဒဏ်ရာရမှုအခြေအနေအသေးစိတ်ကိုလတ်တလောတွင် မပြောနိုင်သေးဟု ဒေသခံများကပြောသည်။လေကြောင်းမှ တိုက်ခိုက်မှုကြောင့် ဒေသခံများ၏နေအိမ်များလည်း ပျက်စီးခဲ့ပြီး အရပ်သားအများအပြား ထွက်ပြေးတိမ်းရှောင်နေရသည်ဟု ဒေသခံများက ပြောသည်။
ယင်းမာပင်မြို့သည် စစ်အာဏာရှင် ဆန့်ကျင်ရာတွင် လက်နက်ကိုင်တော်လှန်ရေးတွင်ရော လူထုသပိတ်တွင်ပါ အားကောင်းနေသည့်ဒေသဖြစ်သည်။ ထိုကြောင့်စစ်ကောင်စီက အကြောက်လွန်ကာ ယခုကဲ့သို့မှားယွင်းတိုက်ခိုက်ခြင်းဟု ဒေသခံများက ပြောသည်။