ချင်းပြည်နယ်နှင့် မကွေးတိုင်းဒေသကြားရှိ ဆွဲလွဲကျင်းရွာနှင့်မဆာတွီ ကျေးရွာကြား၌ တိုက်ပွဲ ပြင်းထန်နေပြီး အကြမ်းဖက်စစ်ကောင်စီတပ်သား ၁၀ဦးထက်မနည်း သေဆုံးကြောင်း Chin Defence Force (Kanpetlet)က ထုတ်ပြန်သည်။
တိုက်ပွဲမှာ ယနေ့ (ဖေဖော်ဝါရီ ၂၈ ရက်) နံနက် ၈နာရီခွဲခန့်မှစတင်ပြီး ညနေ ၄နာရီ အထိကြာမြင့်ခဲ့သည်ဟု ဆိုသည်။
“အကြမ်းဖက်စစ်ကောင်စီအဖွဲ့သည် အဆိုပါသေဆုံးသောစစ်ခွေးအလောင်း များကို လမ်းဘေးရှိ တဲအိမ်တစ်အိမ်တွင်ပြန်စုစည်းပြီး ထိုတဲအိမ်ပါမီးရှို့ ပစ်ကြသည်”ဟု CDF Kanpetletက ပြောသည်။
ပြောက်ကျားစနစ်ဖြင့်ကြားဖြတ်တိုက်ခိုက်ခြင်းခံရသော အကြမ်းဖက် စစ်ကောင်စီ ယာဥ်တန်းသည် ဆွဲလွဲကျင်းရွာနှင့် မဆာတွီရွာအကြားတွင် ယနေ့လည်း ညအိပ်ဦးမည်ဟု CDF Kanpetlet က ခန့်မှန်းသည်။
တိုက်ပွဲအတွင်း CDF Kanpetlet ရဲဘော်များနှင့် လာရောက်ပူးပေါင်းသော လောင်းရှည် PDFရဲဘော်များ တစ်စုံတစ်ရာထိခိုက်မှုမရှိပဲ ပြန်လည်ဆုတ်ခွာ နိုင်ခဲ့သည်ဟု အသိပေးသည်။
တိုက်ပွဲမှာ ဆက်လက်ဖြစ်ပွားနိုင်သဖြင့် ပြည်သူများအနေဖြင့် လောင်းရှည်နဲ့ကျင်ဒွေး လမ်းအသုံးပြုခြင်းမပြုကြရန် နှင့် လိုက်နာပေးကြရန် တိုက်တွန်းသည်။
“စကစဘက်က စစ်ကြောင်းချီလာတော့ သူတို့ကို တိုက်ခိုက်ဖို့ တိုက်ပွဲတွေက နောက်ရက်တွေလည်း ဖြစ်နိုင်ပါတယ်”ဟု CDFနှင့် နီးစပ်သူတစ်ဦးကပြောသည်။
ယမန့်နေ(ဖေဖော်ဝါရီ ၂၇ ရက်)တွင်လည်း မောချောင်းရွာနှင့် မဆာတွီရွာအကြားတွင်လည်း အကြမ်းဖက်စစ်ကောင်စီတပ်ကို ဒေသခံကာကွယ်ရေးတပ်များက တိုက်ခိုက်ခဲ့သဖြင့် အကြမ်းဖက်စစ်ကောင်စီတပ်သား ၂ ဦးသေဆုံးပြီး ၃ဦး ဒဏ်ရာရရှိခဲ့သည်ဟု CDF-ကန်ပက်လက်ကထုတ်ပြန်ထားသည်။