ချင်းပြည်နယ်၊ဖလမ်းမြို့မှ ဟားခါးမြို့ သို့ ရိက္ခာလာပို့သည့် စစ်ကောင်စီတပ်ကို ချင်းပြည်နယ်မှဒေသခံကာကွယ်ရေးတပ်များက လေးရက်အတွင်း သုံး ကြိမ်မိုင်းဆွဲတိုက်ခိုက်ရာ အကြမ်းဖက်စစ်ကောင်စီတပ်သား ၆၀ကျော်သေဆုံးခဲ့ကြောင်းချင်းအမျိုးသားအဖွဲ့ချုပ်(Chin National Organization) က ယနေ့ထုတ်ပြန်သည်။
အကြမ်းဖက်စစ်ကောင်စီတပ်သည် ဖလမ်းမြို့မှ တင့်ကား ၂ စီး၊ မော်တော်ယာဉ် ၂၂ စီး ဖေဖော်ဝါရီ ၂၇ ရက်မှစ၍ဟားခါးမြို့သို့ထွက်ခွာလာခြင်းဖြစ်ပြီး ဒေသခံကာကွယ်ရေးတပ်များက ဖေဖော်ဝါရီ ၂၈ ရက်တွင်စတင်တိုက်ခိုက်ခဲ့သည်။ ဖေဖော်ဝါရီ ၂၈ မှ မတ် ၃ ရက်အတွင်း စစ်ကြောင်းကိုလိုက်လံတိုက်ခိုက်ရာ အကြမ်းဖက်စစ်ကောင်စီတပ်သား ၆၁ ဦးသေဆုံးခဲ့ပြီး ဒေသခံကာကွယ်ရေးတပ်များဘက်မှ ၄ ဦး ကျဆုံးခဲ့သည်ဟုထုတ်ပြန်လျက်တွင် ဖော်ပြထားသည်။
ဖလမ်းအခြေစိုက် ချင်းပြည်ကာကွယ်ရေးတပ် CNDF ၊ ချင်းအမျိုးသားတပ်- CNA နှင့် ချင်းပြည်ကာကွယ်ရေးတပ် -CDFတို့ကပူးပေါင်း၍ ဖေဖော်ဝါရီ ၂၈ ရက်တွင် ဖလမ်းမြို့၊ လုံးရန်ရပ်ကွက်နှင့် တားလ်ကျေးရွာအကြားတွင် ပထမဦးဆုံးအကြိမ် မိုင်းဆွဲ တိုက်ခိုက်ခဲ့သည်။ ယင်းတိုက်ခိုက်မူကြောင့် စစ်ကောင်စီတပ်သား ၁၁ ဦးသေဆုံးခဲ့သည်ဟု CNOက ဆိုသည်။
ထိုအပြင် မတ် ၂ ရက်တွင် ဖလမ်းမြို့နယ် တားလ်ကျေးရွာနှင့် တလန်ဇာန်ကျေးရွာအကြားတွင် ဒုတိယအကြိမ်ပဒေသာမိုင်းဖြင့် မိုင်းဆွဲတိုက်ခိုက်ခဲ့ရာ အကြမ်းဖက်စစ်ကောင်စီတပ်သား ၃၀ ဦးခန့်သေဆုံးခဲ့သည်။ ဒေသခံ မီဒီယာအချို့နှင့် ဒေသခံအချို့က ထိုတိုက်ခိုက်မှုတွင် စစ်ကောင်စီတပ်မှ သေဆုံးသူ ၄၀ ခန့်ပင်ရှိခဲ့ကြောင်းပြောကြားခဲ့ကြသော်လည်းPeople’s Spring ကသီးခြားအတည်မပြုနိုင်ပါ။
Public Service Announcement
အလားတူမတ် ၃ ရက်တွင်လည်းရမ်ထလိုကျေးရွာနှင့်ဒေါက်ထက်ကျေးရွာအကြားတွင် မိုင်းဆွဲခဲ့ရာ စစ်ကောင်စီတပ်သား ၂၀ကျော်သေဆုံးခဲ့သည်ဟု CNOကထုတ်ပြန်သည်။
ထိုတိုက်ပွဲတွင် CNDFဘက်မှ ရဲဘော်တစ်ဦး ဖမ်းဆီးသတ်ဖြတ်ခံရပြီး CNAဘက်မှ ၃ ဦးကျဆုံးခဲ့ကာ ကျဆုံးခဲ့သောရဲဘော်များကို မတ်လ ၃ ရက်တွင် ဂုဏ်ပြုအခမ်းအနားဖြင့် သဂြိုဟ်ခဲ့သည်။
စစ်ကောင်စီတပ်က တိုက်ခိုက်ခံရပြီး အထိနာပြီးနောက် အနီးဝန်းကျင်ရှိကျေးရွာအချို့မှ နေအိမ်များကို မီးရှို့ဖိက်ဆီးခဲ့သည်။
