ရန်ကုန်မြို့ လှိုင်သာယာမြို့နယ်(၅)ရပ်ကွက်အုပ်ချုပ်ရေးမှူးရုံး ပစ်ခတ်ခံရပြီး တစ်ဦးသေဆုံးကြောင်း ဒေသခံပြည်သူများက လူထုနွေဦးသို့ ပြောသည်။
ယနေ့(မတ်လ ၆ရက်)နေ့လယ် ၁၂ နာရီခန့်က ရပ်ကွက်ရုံးရှေ့မှ ပစ်ခတ်သွားခဲ့ခြင်းဖြစ်ပြီး နေရာတွင်ပင် စစ်ကောင်စီအုပ်ချုပ်ရေးအဖွဲ့ဝင် တစ်ဦးသေဆုံးဟု ဆိုသည်။
“ကျွန်တော်တို့ အိမ်အနားမှာတင် ဖြစ်တာ။တစ်ဦးနေရာမှာတင် ပွဲချင်းပြီး သေတယ်တဲ့။ တစ်ဦးလည်း ထိသွားတယ်။အရေးပေါ်ကားလာတယ်။ စခတွေ ကားသုံးစီးနဲ့ လာပြီးစစ်ဆေး သွားတယ်။အခု အဲဒီရုံးနားမှာ စခတချို့ရှိသေးတယ်”ဟု ဒေသခံတစ်ဦးက ပြောသည်။
လက်ရှိတွင် လှိုင်သာယာမြို့ အောင်ဇေယျတံတားပေါ်တွင် ကားလေးများနှင့် ဆိုင်ကယ်များ အဓိကထားစစ်ဆေးနေသည်ဟုလည်း လှိုင်သာယာမြို့နေသူတစ်ဦးက ဆိုသည်။
“အင်အား ၂၀ကျော်လောက်ရှိတယ်။ အင်းစိန်ဘက်အခြမ်းမှာလည်း စစ်ကားအသေးနှစ်စီးရပ်ထားတယ်”ဟု ၎င်းက ပြောသည်။
မတ်လ ၅ရက်ကလည်း ရန်ကုန်မြို့ လှိုင်သာယာမြို့နယ် (၁၀)ရပ်ကွက်အုပ်ချုပ်ရေးမှူးရုံးကို အဝေးထိန်းဗုံးသုံးလုံးဖြင့် တိုက်ခိုက်ခဲ့ကြောင်း God of Death (G.O.D) အဖွဲ့က ထုတ်ပြန်ထားသည်။