စစ်ကိုင်းတိုင်း၊ ရွှေဘိုနှင့် ဝက်လက်နယ်များတွင်အကြမ်းဖက်စစ်ကောင်စီတပ်အား ပြည်သူ့ကာကွယ်ရေးအဖွဲ့များက ခုခံတိုက်ခိုက်ခဲ့ရာ အကြမ်းဖက်စစ်သား ခြောက်ဦးထက်မနည်း သေဆုံးပြီး ထိခိုက်ဒဏ်ရာရသူ အများအပြားရှိခဲ့ကြောင်း ဒေသတွင်းမဟာမိတ်အဖွဲ့များက သတင်းထုတ်ပြန်သည်။
မတ်လ ၉ရက်နေ့ ညနေ (၄) နာရီ အချိန်ခန့်တွင် ရွှေဘိုမြို့နယ် ၊ ဇီးဖြူကုန်း ကျေးရွာ၌ အခြေပြု လှုပ်ရှားနေသည့် အကြမ်းဖက် စစ်ကောင်စီများနှင့် ပျူစောထီး များအား C&T ShweBo ၊ Snaek Eyes PDF ၊ Fighter One ၊ Alpha 7 ၊ Burmese Farmers Defense Force ၊ People Defense Force – Shwebo နှင့် ဗိုလ်ကျားရိုင်း စသော ဒေသခံ ပြည်သူ့ကာကွယ်ရေး တပ်ဖွဲ့ဝင်များက တိုက်ခိုက်ခဲ့သည်။ အဆိုပါ ခုခံတိုက်ခိုက်မှုတွင် အကြမ်းဖက် စစ်ကောင်စီ တပ်ဖွဲ့ဝင် (၃) ဦး သေဆုံးခဲ့ပြီး (၄) ဦး ထိခိုက် ဒဏ်ရာ ရရှိသွားကြောင်း ပြည်သူ့ကာကွယ်ရေးတပ်ဖွဲ့များက သတင်းထုတ်ပြန်သည်။
အလားတူ မတ်လ ၉ ရက်နေ့ ညနေ ၃ နာရီခန့်က ရွှေဘိုခရိုင်၊ ဝက်လက်မြို့နယ် ကမ်းဖြူရွာဘက်မှ ရွှေကျင်ကျေးရွာသို့ အင်အား ၆ဝ ဝန်းကျင်ဖြင့် စစ်ကြောင်းထိုးလာသော အကြမ်းဖက် စစ်ကောင်စီတပ်ကို ဝက်လက်မြို့နယ် PDF တပ်ရင်း (၂)နှင့် ပ.က.ဖ ပူးပေါင်း တပ်ဖွဲ့တို့က တောင်ကုန်းရွာအနီးတွင်တိုက်ပွဲဖြစ်ပွားခဲ့ကြောင်း၊ အဆိုပါ တိုက်ပွဲတွင် အကြမ်းဖက် စစ်ကောင်စီတပ်ဘက်မှ ၃ ဦး သေဆုံးခဲ့ပြီး ၂ ဦးဒဏ်ရာရခဲ့ကြောင်း ဝက်လက် PDF တပ်ရင်း ၂ က သတင်းထုတ်ပြန်သည်။
ထို့နောက်စစ်ကောင်စီတပ်သည် ယမန်နေ့ မတ်လ ၁၀ ရက်နေ့ နံနက် ၆နာရီ ဝန်းကျင်အချိန်တွင် တောင်ကုံးကျေးရွာမှ ပြည်သူ့ နေအိမ် ၅ လုံးကို အကြမ်းဖက် မီးရှို့ဖျက်ဆီးသွားပြီး ဝက်လက်မြို့ ဘက်သို့ဆုတ်ခွာသွားခဲ့ကြောင်း၊ ကျဆုံးသွားသည့် စစ်ကောင်စီတပ်ဘက်မှ တပ်သား ၁ဦးရုပ်အလောင်းကို တောင်ကုံးကျေးရွာအတွင်း၌ စစ်ကောင်စီတပ်ကဖြစ်သလို သင်္ဂြိုဟ်သွားခဲ့ပြီး အဆိုပါ ရုပ်အလောင်းအား ပ.က.ဖအဖွဲ့များမှ ကောင်းကောင်းမွန်မွန် ပြန်လည် သင်္ဂြိုဟ်ပေးခဲ့ကြောင်း၊ တိုက်ပွဲတွင် ဝက်လက် PDF တပ်ရင်း – ၂ ပူးပေါင်းတပ်ဖွဲ့ဘက်မှ ကျဆုံး ထိခိုက်ဒဏ်ရာရသူ မရှိခဲ့ကြောင်း ဝက်လက် PDFက အသိပေးသည်။
Public Service Announcement
