တောင်ဒဂုံမြို့နယ် ၊မောင်းမကန်လမ်းမကြီးပေါ်က CNG ဆိုင်မှာ ဂတ်စ်ဖြည့်ဖို့ တန်းစီနေတဲ့ တက္ကစီတွေကို ကွန်တိန်နာကားက ဝင်တိုက်တာကြောင့် အမျိုးသားတစ်ဦးပွဲချင်းပြီးသေဆုံးကာ လေးဦး ထိခိုက်ဒဏ်ရာရသွားပါတယ်။
ဒီနေ့မနက်ပိုင်း ၆ နာရီလောက်က ဒီယာဉ်တိုက်မှု ဖြစ်ပွားခဲ့တာပါ။
မောင်းမကန်လမ်းမကြီးပေါ်က CNG ဆိုင်မှာ တက္ကစီတွေဟာ ဂတ်စ်ဖြည့်ဖို့ ညအိပ် တန်းစီထားကြတာပါ။ အဲဒီလို တန်းစီထားတဲ့ယာဉ်တန်းကို ကွန်တိန်နာကားကဝင်တိုက်တာလည်းဖြစ်ပါတယ်။
ယာဉ်တိုက်မှုကြောင့် ထိခိုက်ဒဏ်ရာရသွားတဲ့အမျိုးသား လေးဦးမှာလည်း သုံးဦးက စိုးရိမ်ရတယ်လို့သိရပြီး တက္ကစီ ကိုးစီးလည်းပျက်စီးသွားပါတယ်။
မောင်းမကန်လမ်းမကြီးဟာ သီလဝါဆိပ်ကမ်းဆီကိုသွားကြတဲ့ ယာဉ်ကြီးတွေအများဆုံးအသုံးပြု သွားလာကြတဲ့လမ်းမကြီးပါ။
ဒီလမ်းမကြီးပေါ်မှာ ရှိတဲ့ CNG ဆိုင်မှာတော့ လက်ရှိမီးပုံမှန်မရတဲ့ အခြေအနေကြောင့် ဂတ်စ်ဖြည့်ဖို့ တက္ကစီတွေ ၊လိုင်းကားတွေဟာ ညအိပ်စောင့်ဆိုင်းတန်းစီကြတဲ့အခြေအနေရှိနေပါတယ်။
