ဖမ်းဆီးခံထားရတဲ့ ကျောင်းသားသမဂ္ဂအဖွဲ့ဝင် ကျောင်းသားတွေကို စစ်ကောင်စီဟာ စွဲဆိုထားတဲ့ ပုဒ်မတွေနဲ့ ဒီရက်ပိုင်းမှာ ခပ်စိတ်စိတ်ထောင်ချလာပါတယ်။
ဒီနေ့မနက်ပိုင်းမှာဆို လက်ပံတန်းမြို့နယ်လုံးဆိုင်ရာကျောင်းသားများသမဂ္ဂ( ဗကသများအဖွဲ့ချုပ် ) ဥက္ကဋ္ဌဟောင်း ကိုအောင်ကုဋေစိုးကို သာယာဝတီထောင်တွင်းတရားရုံးက နိုင်ငံတော်အကြည်ညိုပျက်စေမှု ပုဒ်မ ၁၂၄ နဲ့ထောင်ဒဏ် ၈ နှစ်နဲ့ ၃ လချလိုက်ပါတယ်။
ကိုအောင်ကုဋေစိုးဟာ ပြီးခဲ့တဲ့ နှစ်မေလ အတွင်းက ဖမ်းခံရတာဖြစ်ပြီး ဒီဇင်ဘာလမှာ ရာဇသတ်ကြီးပုဒ်မ ၅၀၅ (က) နဲ့ ထောင် ၃ နှစ်ချခံထားရသူလည်းဖြစ်တယ်လို့ ဗကသများအဖွဲ့ချုပ်က ထုတ်ပြန်ထားပါတယ်။
ဒါကြောင့် ကိုအောင်ကုဋေစိုးဟာ မတရားဖမ်းဆီးခံရပြီးနောက် ထောင်ဒဏ် စုစုပေါင်း ၁၁ နှစ်နဲ့ ၃ လ ချခံထားရပါတယ်။
အလားတူပါပဲ မတ်လ ၁၀ ရက်က အင်းစိန်ထောင်တွင်းတရားရုံးကနေ ဒဂုံတက္ကသိုလ်ကျောင်းသားများသမဂဂရဲ့အဖွဲ့ဝင်တွေဖြစ်တဲ့ မဝတ်ရည်အောင် ၊ကိုရဲလင်းဦးနဲ့ ကိုနေထက်လင်းတို့ကို ရာဇသတ်ကြီးပုဒ်မ ၅၀၅ (က) နဲ့ ထောင်ဒဏ်၃ နှစ်စီချလိုက်တာရှိပါတယ်။
ဒီလို အမိန့်ချတာဟာ တရားသူကြီးရဲ့ ဆင်ခြင်တုံတရားနဲ့ အမိန့်ချတာလား ၊ လူတစ်စုရဲ့ အမိန့်ကြောင့်အမိန့်ချတာလားလို့တရားခွင်မှာ ကျောင်းသားတွေက တရားသူကြီးကို မေးခွန်းထုတ်ခဲ့တယ်လို့ ဒဂုံတက္ကသိုလ်ကျောင်းသားများသမဂ္ဂရဲ့ထုတ်ပြန်ချက်မှာတွေ့ရပါတယ်။
ဒီလို ထောင်ဒဏ် ချခံလိုက်ရတဲ့ ဒဂုံတက္ကသိုလ်ကျောင်းသားများသမဂ္ဂအဖွဲ့ဝင် ၃ ဦးဟာ အခြားသောကျောင်းသား ၃ ဦးနဲ့အတူ စက်တင်ဘာလ က ရန်ကုန်၊ကျောက်တံတားမြို့နယ်မှာ ဖမ်းဆီးခံလိုက်ရသူတွေဖြစ်ပါတယ်။
အဲဒီ ၆ ဦးမှာပါတဲ့ ကိုစည်သူအောင်တင် ကိုထောင်ဒဏ် ၁၀ နှစ် ၊ မသဉ္ဇာဇော်ကို ထောင်ဒဏ် ၁၃ နှစ် ၊ ကိုမြင်သိန်းနိုင်ကို ထောင်ဒဏ် ၃ နှစ်စီ စစ်ကောင်စီက အမိန့်ချထားတယ်လို့သိရပါတယ်။
စစ်ကောင်စီဟာ စစ်အာဏာရှင်ကိုဆန့်ကျင်တဲ့ ကျောင်းသူ၊ကျောင်းသားတွေကိုဖမ်းဆီးရုံသာမက ထောင်ဝင်စာပို့ပေးတဲ့ ကျောင်းသားတွေကိုပါ ဖမ်းဆီးတာတွေလုပ်ဆောင်ခဲ့တာဖြစ်ပါတယ်။