ကရင်နီ(ကယား)ပြည်နယ် ဒီးမော့ဆိုမြို့နယ် ကုန်းသာကျေးရွာတိုက်ပွဲ၌ ရဲဘော်သုံးဦးကျဆုံးခဲ့ရကြောင်း ပြည်သူ့ကာကွယ်ရေးတပ်-ဒီးမော့ဆို(DMO-Local PDF)က ယနေ့(မတ်လ ၁၄ ရက်) ထုတ်ပြန်သည်။
ကျဆုံးခဲ့ရသော ရဲဘော်သုံးဦးသည် သေးဆူးလဲအုပ်စု၊ကုန်းသာကျေးရွာသို့ ထိုးစစ်ဆင်လာသော အကြမ်းဖက်စစ်ကောင်စီတပ်ကို ခုခံစဥ် မတ်လ ၁၂ရက်က ကျဆုံးခဲ့ရခြင်းဖြစ်သည်။
ထိုတိုက်ပွဲတွင် အကြမ်းဖက်စစ်ကောင်စီတပ်က စစ်ကြောင်းသုံးကြောင်းဖြင့် စစ်ထိုးကာ DMO -Local PDF ကို ပိတ်ဆို့တိုက်ခိုက်ခဲ့သည်ဟု ဆိုသည်။
အဆိုပါ ပိတ်ဆို့တိုက်ခိုက်မှုတွင် တပ်ဖွဲ့လွတ်မြောက်စေရန် မိမိအသက်ကို မငဲ့ညှာဘဲ အကြမ်းဖက်စစ်ကောင်စီကို ဒူးထောက်အရှုံးမပေးဘဲ ကျဆုံးရဲဘော်သုံးဦးမှာ တိုက်ခိုက်ခဲ့ကြောင်း DMO -Local PDFက အသိပေးသည်။
Public Service Announcement
တိုင်းပြည်အတွက် ပေးဆပ်တော်လှန်ခဲ့သော ကျဆုံးရဲဘော်သုံးဦး၏ မိသားစုနှင့် ထပ်တူဝမ်းနည်းကြောင်း ဖော်ပြသည်။
ထို့အတူ တိုင်းပြည်အတွက် အသက်ပေးကာကွယ်ခဲ့သည့် ရဲဘော်သုံးဦးကို ဖက်ဒရယ်ဒီမိုကရေစီသူရဲကောင်းအဖြစ် အလေးနီပြု အသိအမှတ်ပြုကြောင်း DMO -Local PDF က ဆိုသည်။
မတ်လ ၁၀ ရက်မှ ၁၂ရက် အထိကုန်းသာရွာတွင် သုံးရက် ကြာတိုက်ပွဲ၌ အကြမ်းဖက်စစ်ကောင်စီတပ်သား ခြောက်ဦးထက်မနည်း သေဆုံးကြောင်း အလယ်ပိုင်းတိုင်းအထူးစစ်ဆင်ရေးအဖွဲ့က ယမန်နေ့တွင် ထုတ်ပြန်ထားသည်။
