ကလေးမြို့အကျဥ်းထောင်တွင် အကျဥ်းသားအချို့က ထောင်မှူးလည်ပင်းအား ဓားဖြင့်ထောက်ပြီး ထွက်ပြေးရန် ကြိုးစားနေစဥ် အကြမ်းဖက်စစ်ကောင်စီတပ်သားများရောက်လာပြီး ပစ်ခတ်၍ အကျဥ်းသား၇ ဦးသေဆုံးခဲ့သည်ဟု ကလေးမြို့ခံများက ပြောသည်။
ယနေ့(မတ်၁၅)ညနေ ၄ နာရီ နှင့် ၅ နာရီ ကြားတွင် ကလေးထောင်၌ ထိုကဲသို့ ထောင်ဆူမှုဖြစ်ပွားခဲ့ခြင်းဖြစ်သည်။
” ထောင်မှူးလည်လှီးခံရတယ်။ ထောင်ကိုစီးတာ အောင်မြင်ကာနီး စစ်ခွေးတွေ ရောက်လာပြီး ပစ်သတ်တာ” ဟု ယင်းဖြစ်စဥ်ကိုသိသည့် ဌာနဆိုင်ရာဝန်ထမ်းတစ်ဦးကပြောသည်။
အခြားကလေးမြို့ခံတစ်ဦးဖြစ်သလို ဌာနတစ်ခု၏Non-CDM ဝန်ထမ်းတစ်ဦးကမှု “ကြားသိရသလောက်တော့ အဖမ်းခံရတဲ့PDFတွေ နဲ့ ထောင်ဝန်ထမ်းတွေ ဖြစ်တာ ။ဒါကိုစစ်တပ်က ဝင်ပစ်တာ။ စစ်တပ်က အခုထောင်တခုလုံးကို ထိန်းထားလိုက်ပြီ”ဟု ပြောသည်။
Public Service Announcement
သေဆုံးသူ ၇ ဦးသည် မည်သူမှန်းအတိအကျမသိရသေးသော်လည်း နွေဦးတော်လှန်ရေးတွင် ဖမ်းဆီးခံထားရသူများဖြစ်သည်ဟု ဒေသခံအချို့က ပြောသည်။
ဒဏ်ရာရသည့်ထောင်မှူးမှာလည်း ဒဏ်ရာပြင်းထန်ပြီး အသက်သေဆုံးနိုင်ခြေရှိသည်ဟုလည်း ဒေသခံအချို့ကပြောသည်။
အကြမ်းဖက်စစ်ကောင်စီကထိုဖြစ်စဥ်အပေါ်သတင်းထုတ်ပြန်ရာတွင် ကလေးအကျဥ်းထောင်မှ တာဝန်ခံအရာရှိအပါအဝင် အရာရှိ သုံးဦးအား အကျဥ်းသား ၅၀ ခန့်က ဓါးစာခံပြုလုပ်ပြီးထောင်မှ ထွက်ပြေးရန် ပြုလုပ်စဥ် ထောင်တာဝန်ခံအရာရှိမှာပြန်လည်ခုခံသဖြင့်လွတ်မြောက်သွားပြီး
ကျန်နှစ်ဦးအဖမ်းခံနေရသဖြင့် ၎င်းတို့ ၂ ဦးကိုလွှတ်ပေးပြီးမိမိနေရာသိူ့ပြန်ရန် Hand Speaker ဖြင့်ပြောဆိုသတိ့ပေးသော်လည်းမရ၍ပထမသေနတ်ဖြင့်ခြောက်လှန့်ပစ်ကာမလိုက်နာ၍ သေနတ်ဖြင့်တစ်ကယ်ပစ်ခဲ့သည်ဟုထုတ်ပြန်သည်။စစ်ကောင်စီဘက်မှ သေနတ်ဖြင့်ပစ်ခတ်၍ အချုပ်သား ၁၂ ဦးဒဏ်ရာရပြီး အချုပ်သား ၆ ဦးနှင့်အကျဥ်းသား ၁ ဦးစုစုပေါင်း ၇ဦးသေဆုံးခဲ့သည်ဟုဆိုသည်။
စစ်ကိုင်းတိုင်းအတွင်း အကျဥ်းထောင်စီးနင်းတိုက်ခိုက်ခံရမှုမှာ စစ်အုပ်စုအာဏာသိမ်းပြီးနောက်ပိုင်း သုံးလအတွင်း ဒုတိယကြိမ်မြောက်ဖြစ်သည်။ တမူးမြို့ အကျဥ်းဦးစီးဌာန၏ အုတ်ဖိုကန်ဘောင်အကျဥ်းစခန်းကို ပြည်သူ့ကာကွယ်ရေးတပ်များက ဇန်နဝါရီ ၁၀ ရက်တွင် ဝင်ရောက်တိုက်ခိုက်ခဲ့ရာ ထောင်ပိုင် အပါအဝင် ၁၁ ဦး သေဆုံးခဲ့သည်။ ပြည်သူ့ကာကွယ်ရေးအဖွဲ့ဘက်ကလည်း နှစ်ဦးကျဆုံးကာ လေးဦးဒဏ်ရာရခဲ့သည်။
